भांगरभूंय | प्रतिनिधी
पणजी स्मार्ट सिटींतल्या स्मार्ट कॅमेऱ्यांची कामगिरी
दोन वर्सांत 1.85 जाणांनी मोडले येरादारी नेम
अजून 53 टक्के दंड वसूल जावपाचो उरला
भांगरभूंय । समीप नार्वेंकार
पणजी : पणजी स्मार्ट सिटींतल्या स्मार्ट कॅमेरां वरवीं फाटल्या दोन वर्सांच्या काळांत येरादारी नेम मोडिल्ल्या 1.85 लाख जाणांक तालांव दिल्यात. ह्या तालांवांतल्यान सुमार 10 कोटी इतलो दंड वसूल केला. पूण 53 टक्के दंड अजून मेरेन वसूल जावपाचो उरला, अशी म्हायती स्मार्ट सिटीच्या वरिश्ठ अधिकाऱ्यान दिली.
पणजी स्मार्ट सिटी येवजणे खाला तांबडो सिग्नल आनी हेर येरादारी नेम मोडिल्ल्याची नोंद करपी पणजी शारांत सात कॅमेरा आसात. जाल्यार ओव्हरस्पिडींग नेम मोडिल्ल्याची नोंद करपी तीन कॅमेरा आसात. ह्या स्मार्ट कॅमरा वरवीं येरादारी नेम मोडिल्ल्याची नोंद जाता आनी नंबर प्लेटीचे मजतीन तालांव गाडी धनयांच्या मोबायलाचेर एसएमएस वरवीं पावता. उपरांत हे तालांव धनी ऑनलयान भरपाक शकतात.
जून 2023 ते सप्टेंबर 2025 ह्या काळांत ह्या कॅमेरांतल्यान 1,85,329 रुपयांचें चलान जारी करुन 21.30 कोटी इतलो दंड नेम मोडप्यांक दिला. पूण ह्या 1.85 लाखा मदले 99,359 तालांव नेम मोडप्यांनी भरल्यात आनी 86,290 तालांव प्रलंबीत आसात. मजगतीं, 21.30 कोटी मदलो फक्त 46 टक्के इतलो दंड वसूल जाला. 9.80 कोटी रुपयांचो दंड लोकांनी भरला जाल्यार 11.50 कोटी दंड प्रलंबीत आसा, अशी म्हायती अधिकाऱ्यान दिली.
सध्या तालावांतल्यान येवपी सगळो महसूल हो येरादारी खात्याक वता आनी स्मार्ट सिटीक हाचो एक रुपया लेगीत फायदो जायना. सगळी यंत्रणा आनी मनीसबळ ही स्मार्ट सिटीची आसा, पूण स्मार्ट सिटीक कसलोच महसूल पुलीस खात्या कडल्यान येना. देखून ही यंत्रणा आनी मनीसबळ खर्चा खातीर ह्या येवपी तालांवांतल्या दंडांतलो 50 टक्के महसूल स्मार्ट सिटीक दिवपाची मागणी करपी पत्र आमी येरादारी खात्याक बरयलते, अशें अधिकाऱ्यान सांगलें.
तालांव उसरां पावतात, कारण…
मानवी चुकीच्या कारणांक लागून सध्या ट्राफीक कॅमेराचेर नोंद जाल्ले तालांव मॅन्युएल पद्दतीन धाडटात. ह्या कारणांक लागून तालांव पावपाक मात्सो कळाव जाता. जर एआय इंटरग्रेटेड यंत्रणे वरवीं तालांव सुरू केलो जाल्यार त्याच वेळार, धपक्याक तालांव पावतले. कांय उणावांक लागून ही यंत्रणा सक्रीय करूंक ना.
सातांतले 4 कॅमेरा चालू स्थितींत
सध्या सिग्नल मोडप्यांची नोंद करपी पणजे शारांत सात कॅमेरा आसात आनी तातूंतले फक्त चार चालू आसात. सध्या ह्या कॅमरांचे कनेक्शन तशेंच हेर यंत्रणा बसोवपाचें काम चालू आसा. जाल्यार ओव्हरस्पिडींगचो नेम मोडप्यांची नोंद करपी तीन कॅमेरा आसात आनी हे तिनय चालू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
