भांगरभूंय | प्रतिनिधी
89 बलात्कार, 31 जीवघेण्या हल्ल्या सयत 169 गुन्यांव नोंद
भांगरभूंय । प्रतिनिधी
पणजी : गोंयांतल्या खून आनी हेर गंभीर गुन्यांवांची आंकडेवारीची दखल घेतली जाल्यार, अंदूं 1 जानेवारी ते 6 नोव्हेंबर ह्या काळांत 26 खुनाच्यो घडणुको घडल्यात. तातूंतल्या एका खुनाचो तपास लागूंक ना. ते भायर बलात्काराचे 89 गुन्यांव दाखल जाल्यात. तातूंतल्या तीन गुन्यांवांचो तपास लागूंक ना. तशेंच जीवघेणो हल्ले 31, सदोश मनीसवध 11, 4 दरोडे, 8 चोरी मेळून 169 गुन्यांवांची नोंद जाल्या. तातूंतले तीन बलात्कार, दोन दरोडे, एक खून आनी एक चोरी मेळून सात गुन्यांवांचो तपास लागूंक ना. ताका लागून तपासाची टक्केवारी 95.85 टक्के इतली आसा.
गोंयांत फाटल्या चार दिसांत दोन घडणुकांनी तिगांचे खून केले. तातूंतल्या एका प्रकरणांत पुलिसांनी तिगांक अटक केली. जाल्यार दुसऱ्या खून प्रकरणांत दुबावीत अजून सांपडूंक नात. हे फाटभुंयेर गोंयांतले खून आनी हेर गंभीर गुन्यावांची आंकडेवारी पळयत जाल्यार 95.85 टक्के तपास करपाक पुलिसांक येस आयलां. तीन बलात्कार, दोन दरोडे, एक खून आनी एक चोरी मेळून सात गुन्यावांचो तपास लागून नाशिल्ल्याचें मुखार आयलां.
वरचावाडो- मोरजेचे उमाकांत खोत (64) हाका बुधवारा 5 नोव्हेंबराक दनपारां दुबावीत तरेन मरण आयिल्लें. ह्या प्रकरणांत ताच्या घरच्यांनी जमनीच्या वादांतल्यान बिगर गोंयकारान ताचो खून केल्ल्याचो दुबाव उक्तायल्लो. ते उपरांत मांद्रें पुलिसांनी खुनाचो गुन्यांव नोंद करून ते नदरेन तपास सुरू केलो तेन्ना, लोकेश पुत्तास्वामी, रोहीत कुमार प्रजापती आनी विजी सुप्पन ह्या तिगांक अटक केली. मुख्य सुत्रधार तशेंच संबंदीत मोरजेच्या सर्व्हे नं. 156/3 चो जमीन धनी अशोक कुमार नेदुरुमली हो फरारी आसा, पुलीस ताका सोदतात. मजगतीं, साळगांवां बिरेस्तारा 6 नोव्हेंबराक सकाळीं मुड्डोवाडो- साळगांव वाठारांत रिचर्ड डिमेलो (गिरी- बार्देस) हाचे सयत अभिषेक गुप्ता (इंदोर, मध्य प्रदेश) ह्या कामगाराचो खून केलो. साळगांव पुलिसांनी तपास सुरू केलो तेन्ना, डिमेलो हाचो फरारी कामगार जगन्नाथ हाचेर पुलिसांनी दुबाव उक्तावन तपास सुरू केला. मोरजी आनी साळगांवा घडिल्ल्या खुनाच्या घडणुकांनी पुराय राज्यांत खवदळ पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
