भांगरभूंय | प्रतिनिधी
नावशी थळाव्यांच्या विरोधाक लागून प्रकल्प थारिल्लो वादग्रस्त
भांगरभूंय । प्रतिनिधी
पणजीः राज्यांत वादग्रस्त थारिल्लो मरिना प्रकल्पान आपलो मुक्काम आतां मुरगांव बंदरात घुंवडायला. फुडल्या वर्सा मेरेन मरीना प्रकल्प पुराय जातलो. ह्या प्रकल्पाची जेटी टर्मिनल तयार जावन काम निमण्या पांवड्यार आसा, अशी म्हायती मुरगांव बंदर प्राधिकरणाच्या गोपांनी दिल्या.
राज्यांत पर्यटनाक चालना दिवपा खातीर यॉट आनी हेर तरेच्यो पॉश बोटीं नागरून दवरपा खातीर जेटी बांदपाचो हावेस एमपीएन उक्तायल्लो. एमपीएन प्रस्तावित आहोय मरीना हो प्रकल्प गोंय गुंतवणूक प्रोत्साहन मंडळा (आयपीबी) वरवीं सुरवेक तिसवाडीच्या नावशी गावांत प्रस्तावित केल्लो. पूण हो प्रकल्प थळाव्या नुस्तेकारांच्या पोटार येतलो म्हूण थळाव्यांनी ह्या प्रकल्पांक नेटान विरोध केलो. ह्या विरोधाक लागून हो प्रकल्प आयपीबीन स्थगित दवरिल्लो.
पूण ह्या काळांत एमपीएन ह्या मरीना प्रकल्पाची साटली पोटली मुरगांव बंदरात व्हेली. गोपांनी दिल्ले म्हायती प्रमाण, मुरगांव हॅडलेंड सड्यार एमपीएच्या आयसीटी रेल्वे टर्मिनल कुशीक हो मरीना प्रकल्प येतलो.
हांगासर 10 जेटी बांदपाचो टेंडर जावन काम चालीक लागला. गोंय सरकार हो बिल्ड टु ऑपरेट तत्वाचेर प्रकल्प बांदता. हो प्रकल्प पांवड्या पांवड्यानी सुरू जावन पयलो पांवडो जानेवारी 2026त सुरू जातलो. ह्या प्रकल्पाचो टर्मिनल तयार जावन काम निमणे पांवड्यार आसा. फकत मरीना मेरेन वचपी रस्तो अजून तयार जावपाचो उरला, अशीं म्हायती गोपांनी दिली.
हो मरीना प्रकल्प उबारपा खातीर मुंबय जाल्ले इंडीया मॅरीटायम सप्तकांत एमपीएन जेटी उबारपा खातीर मरीनटॅक इंडीया सर्विसेस हांचे कडेन 25 कोटीचीं गुंतवणूक करपी समजातकायेची कबलात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
