भांगरभूंय | प्रतिनिधी
पणजी ः सक्तवसुली संचालनालयाच्या दिल्ली विभागान गोंयच्या कॅसिनो आनी रियल इस्टेट संबंदीत कंपनीच्या धनयांचेर बांबोळे, दोनापावला सयत दिल्ली आनी हेर राज्यांतल्या धाड घाली. शुक्रारा सकाळीं सुरू जाल्ली धाड रातीं उसरां मेरेन चालूच आशिल्ली. ‘फेमा’ कायद्या खाला केल्ले ह्या कारवायेक लागून कंपनी कडेन संबंदीत कॅसिनो आनी रियल इस्टेट उद्देगांत बोवाळ जाला.
मेळिल्ले म्हायती प्रमाण शुक्रारा सकाळीं ईडीच्या दिल्ली विभागाच्या अधिकाऱ्यांनी पयलीं कॅसिनो आनी रियल इस्टेटा संबंदीत कंपनीच्या धनयांचेर दोनापावला बंगलाचेर धाड घाली. ही कारवाय करतना अधिकाऱ्यांनी व्हड प्रमाणांत कागदपत्रां आनी इलॅक्ट्रॉनीक उपकरणां जप्त केल्यांत. हाचे उपरांत बांबोळेच्या बंगल्यांत ही कारवाय सुरू केली. मजगतीं, ईडीच्या दिल्ली विभागान एकाच वेळार कंपनीच्या हेर धनयांच्या दिल्ली आनी हेर राज्यांतल्या वाठारांत धाड घाली.
ईडीन ‘फेमा’ कायद्या खाला ही कारवाय केल्ल्याची म्हायती सूत्रांनी दिल्या. ही कारवाय शुक्रारा रातीं उसरां मेरेन चालू आशिल्ली. कांय सुवातींनी पुराय जाल्ल्या कारवायांनी ईडीन कागदपत्रां आनी इलॅक्ट्रॉनीक उपकरणां सयत व्हड प्रमाणांत विदेशी चलन जप्त केल्या अशी म्हायती मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
