भांगरभूंय | प्रतिनिधी
गोंयांतल्या जिल्हो पंचायत उमेदवारांक रावचें पडटलें सादूर
नवी दिल्ली, खबरां संस्थाः गोंयांत जावपी जिल्हो पंचायत वेंचणुके खातीर आरक्षण जाहीर जाले उपरांत सगळ्यां मदीं वेंचणुकेची उमेद वाडली. तयारी नेटान सुरु जाली. पूण वेंचणूक लढोवपाक सोदपी उमेदवारांक खबरदारी घेवची पडटली. तांकां तांच्या गुन्यांवकारी फाटभूंय विशीं म्हायती दिवची पडटली.
उमेदवारान उमेदवारी पत्रांत गुन्यांवकारी फाटभूंय लिपयल्यार ताका वेंचणूक लढोवपाक अपात्र थारयतले. उमेदवाराच्या नांवार नेण्टे आसतना गुन्यांव नोंद आसत आनी उच्च न्यायालयान गुन्यांव रद्द केल्लो आसलो तरी उमेदवाराक उमेदवारी दाखल करतना ते विशीं म्हायती दिवची पडटला अशें सर्वोच्च न्यायालयान निर्देश दिल्यात.
वेंचणूके प्रक्रियेंत चड पारदर्शकता हाडपा खातीर सर्वोच्च न्यायालयान वयलो इतिहासीक निर्णय घेतला.
मध्य प्रदेशांतल्या भेकनगांवची नगरसेवक पूनम हांचे आड खटल्याची सुनावणी चालू आसतना सर्वोच्च न्यायालयान हो निकाल दिलो. निगोशिएबल इस्ट्रमेंट्स अॅक्ट (1881) च्या कलम 138 खाला ‘चेक बाउन्स’ जाल्ल्या प्रकरणांत न्यायालयान एक वर्स बंदखणीची ख्यास्त फर्मायल्ली.
उपरांत उच्च न्यायालयान ही ख्यास्त रद्द केली, पूण पूनमान आपली उमेदवारी दाखल करतना गुन्यांवकारपणाची म्हायती लिपोवन दवरली. हाका लागून सकयल्या न्यायालयान तिची उमेदवारी रद्द केली. पूनमान ह्या न्यायालयाच्या निर्णयाक सर्वोच्च न्यायालयांत आव्हान दिल्लें. हाचेर सर्वोच्च न्यायालयान वयले निर्देश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
