भांगरभूंय | प्रतिनिधी
वॉशिंगटन, खबरां संस्था: राष्ट्राध्यक्ष डोनाल्ड ट्रम्प दुसरे खेपे सत्तेर आयले उपरांत जायते निर्णय घेतल्यात. हातूंत आनीक एका म्हत्वाच्या निर्णयाचो आस्पाव जाला. ट्रम्प प्रशासनान जाहीर केल्ल्या नव्या मार्गदर्शक तत्वां प्रमाण, आतां अमेरिकेंत स्थलांतर करपाक सोदपी परदेशी नागरिक जाका गोडेंमूत आनी काळजाचे दुयेंस आसल्यार ताका व्हिसा आनी ग्रीन कार्ड मेळूंक शकना. अमेरिकेच्या परराष्ट्र विभागान ही मार्गदर्शक तत्वां संवसारभरांतल्या अमेरिकेच्या दूतावास आनी कॉन्सुलर कार्यालयांक धाडल्यात.
खंयचे दुयेंस आसल्यार व्हिसा मेळचो ना?
ज्या अर्जदारांच्या वैजकी स्थितीचेर उपचार करपाक लाखांनी डॉलर खर्च येवंक शकता, तांकां म्हायती दिवपाचो निर्देश परराष्ट्र विभागान व्हिसा अधिकाऱ्यांक धाडिल्ल्या पत्रांत दिला. उल्लेख केल्ल्या दुयेसांचें वळेरींत काळजाचे आनी रगतपेशीं संबंदीत दुयेंस, स्वास संबंदीत दुयेंस, कॅन्सर, गोडेंमूत, मेटाबॉलीक दुयेंस, न्यूरोलॉजिकल दुयेंस आनी मानसीक दुयेंसांचो आस्पाव आसा.
मार्गदर्शक तत्वांनी मोटसाण सारकिल्या परिस्थितीचो विचार करचो असो खासा सल्लो अधिकाऱ्यांक दिला. कारण हाका लागून दमो, स्लीप एपनिया, उच्च रगतदाब सारकिल्ले दुयेंस जावंक शकतात. जाचेर उपचार चड खर्चीक आसता.
अर्जदारांक सरकारी मजती बगर तांच्या पुराय अपेक्षीत आयुश्यभर अशा दीर्घकाळ वैजकी सेवेचो खर्च भागोवपा खातीर अर्थीक साधनां आसात काय ना हाची चवकशी करपाची नव्या मार्गदर्शक तत्वां खाला व्हिसा अधिकाऱ्यांक स्पश्ट सुचोवणी दिल्या.
इमिग्रेशन तज्ञ म्हणटात, ह्या धोरणाक लागून जाण्ट्या अर्जदारांक आनी सामान्य दीर्घकालीन दुयेंस आशिल्ल्यां खातीर कायदेशीर स्थलांतर खूब उणें जातलें, तेच बरोबर गिरेस्त आनी निरोगी अर्जदारांक हाचो फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
