माती वाटोवपा खातीर समजिकाय कबलात

भांगरभूंय | प्रतिनिधी

मुख्यमंत्री डॉ. प्रमोद सावंतः 23 ऑगस्टाक जातल्यो सद्गुरुंचे हाजिरेंत सयो

भांगरभूंय । प्रतिनिधी

पणजीः मातयेच्या संवर्धना खातीर राज्य सरकारा वतीन तशेंच पर्यावरण आनी हवामान बदल खात्या वतीन सद्गुरू जग्गी वासुदेव हांचे ईशा आवटरीच संस्थे वांगडा समजिकाय कबलात केल्या. श्यामा प्रसाद मुखर्जी स्टेडियम ताळगांवां सद्गुरुंचे हाजिरेंत 23 ऑगस्टाक सांजेच्या 4 वरांचेर समजिकाय कबलातीचेर सयो करतले, अशी म्हायती डॉ. प्रमोद सावंत हांणी बुधवारा पत्रकार परिशदेंत दिली.

ही कार्यावळ सगळ्यां खातीर उक्ती आसतली. ते खातीर पूर्वनोंदणी गरजेची आसा. हे कार्यावळीक केंद्रीय मंत्री श्रीपाद नायक, पर्यावरण मंत्री निलेश काब्राल आनी हेर मंत्री तशेंच आमदार हाजीर रावतले. हे आदीं सद्गुरूचें सगळ्यांक मार्गदर्शन मेळटलें. हे आदीं ईशा आवटरीच संस्थेन गुजरात, राजस्थान, उत्तर प्रदेश, मध्य प्रदेश, दिल्ली, महाराष्ट्र, आंध्रप्रदेश, कर्नाटक, तामीलनाडू ह्या राज्यांतल्या सरकारा कडेन समजिकाय कबलात केल्या, अशेंय मुख्यमंत्री डॉ. सावंत हांणी सांगलें.

गोंय सरकारा वतीन सद्गुरुंचो सत्कार जातलो. हे कबलातीच्या माध्यमांतल्यान अन्न सुरक्षा आनी शाश्वत अन्न प्रणाली, शाश्वत शेती प्रणाली, सैमीक आनी सेंदरीय शेती ह्या विशयाचेर एकवटान काम करतले. हे खातीर पर्यावरणा संबंदान काम करपी संस्थांनी आनी चड करून तरणाट्यांनी हातूंत वांटो घेवन काम करचें, असो उलो मुख्यमंत्री डॉ. सावंत हांणी मारलो. सद्गुरूंनी अंदूं 21 मार्चाक माती वाटोवपाची चळवळ सुरु केल्या. युनायटेड नेशन एजन्सीन हे चळवळीक ‘माती विलोपन’ अशें म्हणलां. संवसारांतल्या सुपीक मातयेचें मरण मनीस जातीच्या अस्तित्वाक धोकादायक आशिल्ल्यान ही चळवळ सुरू केल्या. हाची जागृती करचे खातीर सद्गुरून 100 दिसांनी 30 हजार किलोमिटर एकल्यान मोटरसायकली वयल्यान 27 देशांतल्यान प्रवास केला. हे रॅलीची सांगता कोयंबतूर वाठारांत जाली.

30 टक्के माती नापीक…

ही चळवळ संवसारभरांतल्या सुपीक मातयेच्या भिरांकूळ घट्टणाचे फाटभुंयेर सुरू केल्या. जाता लागून संवसारीक अन्न आनी उदक सुरक्षेक धोको निर्माण जाला. देशांतली सुमार 30 टक्के सुपीक माती आदींच नापीक जाल्या आनी उत्पादन दिवपाक असमर्थ थारल्यात, अशी म्हायती मुखार आयल्या.