भांगरभूंय | प्रतिनिधी
‘द ब्लू ट्रेल’ उक्तावणाचो सिनेमा
पणजीः एल मॅस्कारो हांच्या ‘द ब्लू ट्रेल’ सिनेमान इफ्फीची सुरवात जातली. पणजे 20 नोव्हेंबरा सावन सुरू जावपी 56व्या आंतरराष्ट्रीय सिने महोत्सवांत 81 देशांतले 240 परस चड सिनेमांचे प्रसारण जातलें. समारोप सुवाळ्यांत नामनेचे अभिनेते रजनीकांत हांचो भोवमान जातलो अशें म्हायती आनी प्रसारण राज्यमंत्री डॉ. एल मुरुगन हांणी सांगलें.
भारताचो सगल्यांत प्रतिश्ठीत चित्रपट सुवाळो- 56वो आंतरराष्ट्रीय भारतीय चित्रपट महोत्सव (इफ्फी) ह्या वर्सा 20 ते 28 नोव्हेबरा मजगतीं गोंयांत जातलो. ह्या महोत्सवाच्या कर्टन-रेझर कार्यावळीचें आयोजन नवी दिल्लींत केलें. ह्या वेळार महोत्सवाच्या समृद्ध आनी वैविध्यपूर्ण कार्यावळीची झलक सादर केली.
अंदूं 81 देशांतले 240 परस चड सिनेमा ह्या महोत्सवांत दाखयतले. तातूंत 13 वर्ल्ड प्रिमियर, 4 आंतरराष्ट्रीय प्रिमियर आनी 46 आशियाई प्रिमियर हांचो आस्पाव आसा. ह्या वर्सा इफ्फीक 127 देशांतल्यान सुमार 2,314 सिनेमांची नोंदणी जाल्या. जी ह्या महोत्सवाच्या वाडट्या संवसारीक प्रतिश्ठेची साक्ष दिता.
म्हायती आनी प्रसारण राज्यमंत्री डॉ. एल. मुरुगन हांणी सांगलें, अंदूंचो महोत्सव नवे उपक्रम आनी समावेशकतायेचो मिलाफ सादर करतलो. ह्या वर्सा 50 परस चड बायलां दिग्दर्शकांचे सिनेमा इफ्फींत प्रदर्शीत जातले. जातूंतल्यान सरकाराचो नारीशक्तीक प्रोत्साहन दिवपाचो संकल्प दिसून येता.
तांणी मुखार म्हणलें ओटीटी मळा वेल्या उत्कृश्टतायेचो भोवमान करपी पुरस्कार ह्या वर्साय दितले. तशेंच पटकथा लेखन, निर्मिती रचणूक आनी ध्वनी अशा मळार उदयाक येवपी प्रतिभेक प्रोत्साहन दिवपाचो यत्न सुरूच उरतलो. तशेंच सरकार चित्रपट सेन्सॉर प्रक्रियेचें सुलभीकरण आनी अँटी-पायरेसी कायद्याच्या घटाये खातीर प्रयत्नशील आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
