भांगरभूंय | प्रतिनिधी
चवकशी करून जातली कारवाय : वीज मंत्री
पणजी: मतदार पडटाळणी मोहिमेच्या कामा खातीर सबस्टेशनांतल्यान वीज खात्याच्या सहाय्यक अभियंत्याक पुलिसांचे मजतीन ताब्यात घेवपाची उपजिल्होधिकाऱ्याची कृती अयोग्य आशिल्ल्यान मुखेल सचिवां कडेन खात्यान कागाळ केल्या. मुखेल सचिव या कागाळीचेर चवकशी करून कारवाय करतले, अशी म्हायती वीज मंत्री सुदिन ढवळीकार हांणी दिली.
वीज पुरवण ही अत्यावशक सेवा आसा. 110 केव्ही वा 220 केव्ही सबस्टेशनांतल्या अभियंत्याक कामाच्या वेळार भायर सरपाक मेळना. सबस्टेशनांत परवानगी घेवपा बगर कोणाकूच प्रवेश मेळना. परवानगी घेनासतना पुलीस सबस्टेशनांत कशे आयले? तशेंच सबस्टेशनांतल्या अभियंत्याक कामाच्या वेळार भायर सरपाक मेळना. तरी लेगीत ताका ताब्यांत घेवपाचो आदेश उपजिल्होधिकाऱ्यान दिलो. ही कृती अयोग्य आशिल्ल्याचें वीज मंत्री सुदिन ढवळीकार हांणी सांगलें. वीज खात्याचो अभियंतो तशेंच उपजिल्होधिकारी हे सरकारी अधिकारी आशिल्ल्यान मुखेल सचीव चवकशी करून कारवाये विशीं निर्णय घेतले अशें वीज मंत्री सुदिन ढवळीकार हांणी सांगलें.
संबंदीत सहाय्यक अभियंत्याक एसआयआरचें काम दिवचे न्हय, अशें वीज खात्यान जिल्होधिकारी कार्यालयाक कळोवंक ना. एसआयआरच्या वावराक सरकारी अधिकाऱ्यांची आवश्यकता आसता. लोकप्रतिनिधी कायद्या प्रमाण हो आदेश जारी जाला. सहाय्यक अभियंत्यांक अटक जावंक ना, एसआयआरच्या कामा खातीर ताका ताब्यांत घेवपाची कृती जाली, अशें उत्तर गोंयचे जिल्होधिकारी अंकीत यादव हांणी सांगलें. चवकशी वेळार ही सगली स्थिती मांडटले, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
