भांगरभूंय | प्रतिनिधी
मुखेल दुबावीत अजूनय गायब; उमाकांत खून प्रकरण
पेडणें: मोरजी वयलोवाडो हांगासरले ज्येश्ठ नागरीक उमाकांत खोत हांच्या खून प्रकरणांत मांद्रें पुलिसांनी तिगां दुबावितांक अटक केल्या. तांकां न्यायालया मुखार हजर करतकच न्यायालयान तांकां 14 दिसांची पुलीस कोठी दिल्या. जाल्यार मुखेल दुबावीत अजूनय गायब आसा. उमाकांत खोत हांचे कुडीचेर निमाणे संस्कार केले.
वयलोवाडो मोरजी हांगासरले ज्येश्ठ नागरीक उमाकांत खोत हांचो जमीन वादांतल्यान खून जाल्लो. मांद्रें पुलिसांनी जमीन धनी अशोक कुमार नेदुरुमली, सुपरवायझर लोकेश पट्टा स्वामी, जेसीपी ऑपरेटर रोहीत कुमार प्रजापती आनी विजी सुप्पन अशा वट्ट चार जाणांचेर गुन्यांव नोंद केला. काल (शुक्रारा) तांकां न्यायालया मुखार हजर करतकच तिगांक 14 दीस पुलीस कोठी दिल्या. पूण मुखेल दुबावीत जमीन धनी अशोक कुमार नेदुरुमाली हाचो सोद घेवपा पुलीस पंगड कार्यरत जाल्ल्याची म्हायती मांद्रें पुलीस निरिक्षक गिरेंद्र नायक हांणी दिली.
उमाकांत खोत हांचे कुडीचेर वयलोवाडो मोरजी हांगा शोकाकूल वातावरणांत निमाणे संस्कार केले. पूण थळाव्या नागरिकांनी आनी खोत हांच्या कुटुंबान जाता तितले बेगीन दुबाविताक अटक करून आमकां न्याय दिवचो अशी मागणी केली.
उमाकांत खोत हांची कुळाची आशिल्ली जमीन अशोक कुमार हाणें जमीन धनया कडल्यान भायले भायर विकती घेतिल्ली. पूण जमीन धनयान कुळाक विस्वासांत घेनासतना जमीन विकली. तशेंच कुळाचे जमनीत बेकायदो रस्तो करून लेगीत उमाकांत खोत हांचेर जमीन धनयान अन्याय केल्लो.
त्या संदर्भांत उमाकांत खोत हांणी फाटल्या वर्सां सावन टीसीपी विभागाक लेखी स्वरुपाच्यो कागाळी केल्ल्यो. वेगळ्या वेगळ्या खात्याक कागाळी पाविल्ल्यो. पूण ताची कोणेच दखल घेतली ना. तांणी बेकायदो रस्तो कुळाच्या जमनींतल्यान करून थंय बांदकामां करपाक सुरवात केली. दोंगर कापणीचेंय काम सुरू आशिल्लें. तें पळोवपाक उमाकांत खोत हे आपल्या जमनींत गेल्ले.
5 वेर उमाकांत खोत हांणी आपले जमनींत बेकायदो दोंगर कापणीचें काम सुरू आशिल्ल्याची पळोवणी करपा खातीर ते गेल्ले. थंय तलाठीय हाजीर आशिल्लो. पूण तलाठी थंय पावचे पयलींच उमाकांत खोत हांकां खर मारपेट करून तांचो खून केल्लो.
मजगतीं, थळाव्या नागरिकांनी जंय सर्वे क्रमांक 156/3 तल्या जमनीतल्या प्रकल्पाक सरकारान दिल्ली मान्यताय रद्द करची. ह्या प्रकल्पाक थारो दिवचो न्हय अशी मागणी थळावे आमदार जीत आरोलकार ज्या वेळार सांत्वन करपा खातीर आयिल्ले त्या वेळार केली. त्या वेळार आमदारान ही तुमची मागणी सरकारा कडेन लेखी स्वरुपांत दियात, ताचेर योग्य तो निर्णय घेतले अशें आस्वासन आरोलकार हांणी दिल्लें.
मुखेल दुबावीत अशोक कुमार नेदुरुमली हो बंगळुरूंत रावत आशिल्ल्याची म्हायती मेळ्ळे उपरांत ताचो सोद पुलीस घेतात.
उमाकांत खोत हांचे फाटल्यान घरकान्न, दोन लग्न जावंक नाशिल्ल्यो धुवो आनी एक लग्न जावंक नाशिल्लो पूत असो घराबो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
