भांगरभूंय | प्रतिनिधी
सर्वोच्च न्यायालयाच्या आदेशांक पाळो दीत पालिका प्रशासनाचे निर्देश
भांगरभूंय । प्रतिनिधी
पणजी : सर्वोच्च न्यायालयाच्या आदेशांक पाळो दीत सगल्या शारांनी बेवारशी सुण्यां खातीर खाणांची सुवात (फिडींग सेंटर) अधोरेखीत करपाक सांगलां. हें ‘फिडींग सेंटर’ एनजीओ आनी प्राणी मोग्यां वांगडा मेळून रस्त्या पसून पयस आनी लोकांची यो- वच उण्या प्रमाणांत जाता थंय हीं सेंटरां उबारपांक सांगलां. हे विशींचो आदेश सगल्या पालिका आनी म्हानगरपालिकांक पालिका प्रशासनान जारी केला, अशी म्हायती शार उदरगत खात्याचे वरिश्ठ अधिकारी पंकज राणे हांणी दिली.
सर्वोच्च न्यायालयान बेवारशी सुण्यां विशीं घेतिल्ले स्वेच्छा दखल याचिकेंत दिल्ले आदेशा प्रमाण पालिका प्रशासनान हे विशींचे निर्देश सगल्या पालिकांक दिल्यात. तशेंच रस्त्याद सुण्यांचेर नियंत्रण दवरपा खातीर कसलीं पावलां राज्यांतल्या पालिकांनी उबारल्यात हे विशींची थोडे भितर म्हायती दिवपी प्रतिज्ञापत्र आमी सर्वोच्च न्यायालयात सादर केलां, अशें वरिश्ठ अधिकाऱ्यान सांगलें.
हातूंत आमी सगल्या पालिका आनी म्हानगरपालिकेक शारांत बेवारशी सुण्यां खातीर ‘फिडींग सेंटर’ उबारपा खातीर एनजीओ आनी सुण्यांक अन्न घालपी सुणें मोगी हांचे मदीं कबलात करपाक सांगलां. हांचे मजतीन ‘फिडींग सेंटर’ उबारपा खातीर एक सुवात सोदची. ही सुवात रस्ते, गर्दी आशिल्ले वाठार, भुरगीं आनी जाण्टे भोंवतात त्या वाठारा पसून पयस आसची. जेवण घातले उपरांत ह्यो सुवातो नितळ करच्यो, अशे निर्देश पालिकांक दिल्यात.
ज्या प्रभागांनी सुण्यांचो आंकडो चड आसा त्या सुवातांचो एनजीओ आनी जनावर मोगींचे मजतीन तांचो सोद घेवपांक लायला. जर एका प्रभागा परस चड प्रभागांनी सुण्यांचो आंकडो चड आसा जाल्यार प्रभागांचे संख्ये प्रमाण हीं फिडींग सेंटरां वाडोवचीं. जर कोणूय रस्त्यार तांकां खाण घालता जाल्यार ताका दंड दिवन कारवाय करपाचे आदेश दिला. तशेंच हे विशीं हेल्पलायन नंबर पालिका जारी करतली, अशी म्हायती अधिकाऱ्यान दिली.
जे सामान्य लोक ह्या फिडींग सेंटाराचेर येवन सुण्यांक खाण घालपाक सोदतात तांणी पालिकेंत वचून आपली नोंदणी करची. तशेंच जे लोक ह्या बेवारशी सुण्यांक पोसके घेवपांक सोदतात त्या इत्सूक लोकांनी पालिकेंत नोंदणी करची. सुण्यांचें टॅगींक केले उपरांत तांकां हें सुणें घरा व्हरपाक मेळटलें. पोशिल्लो सुणो हो परतून रस्त्यार येवचो ना हाची जापसालदारकी धनयान घेवची पडटली, अशें अधिकाऱ्यान सांगलें.
प्रतिज्ञापत्र सर्वोच्च न्यायालयांत दाखल
राज्यांत बेवारशी सुण्यांच्या उपद्रवाचेर नियंत्रण दवरपा खातीर कसल्यो उपाय येवजण्यो हातांत घेतल्यात हे विशीं थोडे भितर म्हायती दिवपी प्रतिज्ञापत्र 31 ऑक्टोबराक पालिक प्रशासनान सर्वोच्च न्यायालयात दाखल केला. हातूंत आमी सगल्या पालिकांनी हातांत घेतिल्ली सुविधा, देखीक सुण्याचे लसीकरण आनी निर्बिजीकरण, सुण्यां खातीर आलाशिरो, सुणी धरपा खातीरचे मनीस बळ तशेंच ‘फिडींग सेंटर’ आनी हेल्पलायन विशीं जारी केल्ल्या निर्देशाची हातूंत म्हायती आसा, अशें अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
