भांगरभूंय | प्रतिनिधी
प्रधानमंत्री नरेंद्र मोदी हांचो काँग्रेसीचेर आरोप
‘वंदे मातरम्’च्या विभाजनान रोंयलें फाळणीचें बीं
हें गीत एक मंत्र, एक संकल्प, भारत मातेची पुजा
खबरां संस्था
नवी दिल्ली : राष्ट्रगीत ‘‘वंदे मातरम्’’ ही भारताच्या स्वातंत्र्याची घोशणा आशिल्ली. ती दरेका युगांत प्रासंगीक आसा. ‘वंदे मातरम्’ हो एक मंत्र, एक सपन, एक संकल्प, एक उर्जा आसा. हें गीत भारत मातेची पुजा आसा. 1937 त ‘वंदे मातरम्’चो एक कुडको काडून उडयलो. ताचे कुडके केले. वंदे मारतमच्या विभाजनान देशाचे फाळणीचें बीं रोंयलें. ती फूट घालपी विचारसरणी आयज लेगीत देशा खातीर एक आव्हान आसा, अशें प्रधानमंत्री नरेंद्र मोदी हांणी सांगलें.
राष्ट्रगीत वंदे मातरमाक शुक्रारा 150 वर्सां पुराय जालीं. ते निमतान शुक्रारा नवी दिल्लींतल्या इंदिरा गांधी इनडोर स्टेडियमांत आयोजीत केल्ले सभेंत प्रधानमंत्री नरेंद्र मोदी उलयताले.
प्रधानमंत्री मोदी हांणी सांगलें, भारतमाता सरस्वती, लक्ष्मी आनी दुर्गा आसा, अशें ‘वंदे मातरम्’च्या मूळ मजकुरांत म्हणलां. जेन्ना दुस्मानान आतंकवादा वरवीं भारताचे सुरक्षेचेर आनी सन्मानाचेर हल्लो करपाचें धाडस केलें, तेन्ना नव्या भारताक आतंकवादाचो नाश करचे खातीर दुर्गा कशें जावचें तें लेगीत खबर आसा, हें पुराय संवसारान पळयलें. बंकिमचंद्र हांची ‘आनंदमठ’ ही फक्त एक कादंबरी ना, ती स्वतंत्र भारताचें सपन आसा. बंकिमबाबून बरयिल्ल्या दरेका उतराक खोल अर्थ आसा, अशें रवींद्रनाथ टागोर हांणी एकदां म्हणिल्लें. हें गीत गुलामगिरीच्या काळांत रचिल्लें, पूण तें त्या काळा पुरतें मर्यादीत ना. वंदे मातमर दरेका युगांत प्रासंगीक आसा. 1875 त जेन्ना बंकिमचंद्र हांणी बंगदर्शनांत ‘वंदे मातरम्’ प्रकाशीत केलें तेन्ना कांय लोकांक तें फक्त एक गीत अशें दिसलें. पूण ल्हवू ल्हवू, ‘वंदे मातरम्’ हें भारताच्या स्वातंत्र्या खातीर झुजपी लाखांनी लोकांचो आवाज जालें.
आयज आमी आमच्या राष्ट्रीय गिताचीं 150 वर्सां मनयतात. ही आमच्या देशाच्या म्हान विरांक आर्गां आसा. फांसार दितना ‘वंदे मातरम्’चो जयजयकार करपी, ‘वंदे मातरम्’चो जयजयकार करतना मार खावपी लाखांनी शहिदांक सलाम. ‘वंदे मातरम्’ आमकां इतिहासांत फाटीं घेवन वता. तें आमकां आमच्या फुडारा खातीर, असो खंयचोच संकल्प ना जो पुराय करपाक मेळना, अशें खंयचीच मोख ना जी आमी भारतीय मेळोवपाक शकनात, अशें नवें धाडस दिता, अशें मोदी हांणी सांगलें.
प्रधानमंत्री मोदी हांणी ‘वंदे मातरम्’च्या सामुहीक गायनांत वांटो घेतलो.
काँग्रेस अधिवेशनांत सगल्यांत पयलीं गायलें
7 नोव्हेंबर 1875 ह्या दिसा बंकिमचंद्र हांणी बंगदर्शन ह्या साहित्यीक नेमाळ्यांत पयले खेपे ‘वंदे मातरम्’ प्रकाशीत केलें. 1896 त रवींद्रनाथ टागोर हांणी भारतीय राष्ट्रीय काँग्रेसीच्या अधिवेशनांत माचयेरय ‘वंदे मातरम्’ गायलें. राष्ट्रीय पांवड्यार भौशीक तरेन हें गीत गावपाची ही पयली खेप आशिल्ली.
‘वंदे मातरम्’ गावपी भुरग्यांक 5 रुपया दंड
1905 त बंगालाच्या फाळणी आड ‘वंदे मातरम्’ ही एक व्हड घोशणा जाली. रंगपूरांतले एके शाळेंत भुरग्यांनी हें गीत गायलें तेन्ना ब्रिटीश अधिकाऱ्यांनी 200 विद्यार्थ्यांक ‘‘वंदे मातरम्’’ म्हणिल्ले खातीर दरेकी 5 रुपयांचो दंड फर्मायलो.
टपाल तिकेट, नाण्याचें लोकार्पण
राष्ट्रगिताच्या 150 व्या वर्धापन दिसा निमतान प्रधानमंत्र्यान एक टपाल तिकेट आनी एका नाण्याचें लोकार्पण केलें. तांणी वर्सभर चलपी स्मारकाचें उक्तावण केलें आनी एक वॅबसायट लॉन्च केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
