भांगरभूंय | प्रतिनिधी
– 2019 गोंय नोकरी घोटाळो
– दुबावीत पुजा नायकाचो आरोप
– मुख्यमंत्र्यांचो हात ना म्हूण स्पश्टीकरण
भांगरभूंय । प्रतिनिधी
पणजी : 2019 वर्साच्या गोंय नोकरी घोटाळ्यांतली मुखेल दुबावीत पुजा नायक हिणें 17 कोटींच्या कथीत घोटाळ्यांत आयएएस अधिकारी आनी एक वरिश्ठ पीडब्ल्यूडी अधिकारी आशिल्ल्याचो आरोप केला. प्रुडंट मिडियाक दिल्ले खाशेले मुलाखतींत तिणें दावो केला. सुमार 600 जाणां कडल्यान पयशे घेतल्यात, मात एकूय नोकरी मेळूंक ना, असो दावो तिणें केलो. तशेंच ह्या वेव्हारांत एक मंत्रीय आसा, अशेंय तिणें म्हणलां.
आपणे दिल्ले पयशें 24 वरां भितर परत मेळना जाल्यार संबंदीत अधिकाऱ्यांचें, मंत्र्याचें नांव मुख्यमंत्र्यांक सांगता, अशी शिटकावणीय तिणें दिल्या. ‘आमी आतां नोकऱ्यो मागिनात, आमकां आमचें पयशे परत दियात’, अशी तिणें मागणी केल्या. ह्या प्रकरणांत मुख्यमंत्री डॉ. प्रमोद सावंत हांचो कसलोच हात ना, अशें स्पश्टीकरणूय पुजान दिलां.
कोटयांनी रुपयांच्या ह्या घोटाळ्याची फाटीं खूब चर्चा जाल्ली. कांय जाणांक अटक जाल्ली, तातूंत सरकारी कर्मचारीय आशिल्ले. 2019 ते 2021 ह्या दोन वर्सांच्या काळांत तिणें संबंदितांक खंय पयशे दिल्ले. हातूंत तिका कमिशनूय मेळटाले. खासा गजाल म्हणल्यार पर्वरे दोन सुवातांचेर हो वेव्हार जातालोच, सचिवालयांतल्या संबंदीत मंत्र्याच्या ऑफिसांतूच खंय तिणें पयशे दिल्ले. लोकांचे जाता तितले, जमता तशें पयशे दिले, अशेंय पुजा सांगता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
