भांगरभूंय | प्रतिनिधी
मुख्यमंत्री : पुराय गोंयभरांत जालो वंदे मातरमचो गजर
भांगरभूंय । प्रतिनिधी
पणजी : देशाच्या स्वातंत्र्या खातीर खूब जाणांनी मरण पत्करलें. आयज देशाचे उदरगती खातीर मरपाची न्हय जाल्यार जगपाची गरज आसा, अशें मुख्यमंत्री डॉ. प्रमोद सावंत हांणी सांगलें. विविधता आसून लेगीत एकचार निर्माण करपांत वंदे मातरम् ह्या गिताचें व्हड योगदान आसा, अशेंय तांणी म्हणलें.
बंकीमचंद्र चटर्जी हांच्या वंदे मातरम् ह्या गिताक शुक्रारा 150 वर्सां पुराय जालीं. हे निमतान पुराय देशांत वंदे मातरम् गीत म्हणपाच्यो कार्यावळी जाल्यो. गोंयांत मुखेल कार्यावळ कला अकादमींत जाली. मुख्यमंत्री डॉ. प्रमोद सावंत हे मुखेल सोयरे म्हूण कार्यावळीक हाजीर आशिल्ले.
बंकीमचंद्र चटर्जी हांच्या वंदे मातरम् ह्या गितान सुटके झुजाऱ्यां खातीर उर्बा दिली. आयज लेगीत हें गीत तरणाट्यांक उर्बा दिवपी आसा. समर्पण, त्याग, देशाभिमान जागोवपाची तांक ह्या गितांत आसा. वीर सावरकार हांणी अंदमानचे कादयेंत लेगीत वंदे मातरमं हे उतरां बरयल्लीं. हाका लागून घटनेंत ह्या गिताक योग्य तो मान दिला. जन गण मन हें राष्ट्रगान जाल्यार वंदे मातरम् हें राष्ट्रीय गीत आसा.
भारतांत तरेकवार जाती, तरेकवार भाशा, तरेकवार संस्कृतीचे लोक रावतात. आयच्या तरणाट्यांनी विकसीत भारता खातीर जगून योगदान दिवपाची गरज आसा. गोंयच्या सगल्या वाठारांत नेटान उदरगत चालू आसा. वैजकी, अभियांत्रिकी, फार्मसी, आयुर्वेदीक, शेती अशीं सगले तरेचीं म्हाविद्यालयां गोंयांत आसात. तरणाट्यांनी उच्च शिक्षण घेवपा सयत गोंय तशेंच देशाचे उदरगती खातीर जगपाचो उलो मुख्यमंत्र्यांनी मारलो. सरकारी कार्यालयां तशेंच शिक्षण संस्थांनी शुक्रारा वंदे मातरम् गीत म्हणपाच्यो कार्यावळी जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
