भांगरभूंय | प्रतिनिधी
पणजीः गोंयची फामाद थ्रायथलोन सर्त आयर्नमॅन ७०.०३ गोंयची पाचवी आवृत्ती ९ नोव्हेंबराक सुरू जातली. हे सर्तींत संवसारांतल्या ३१ देशांतले सुमार १३०० सर्तक वाटेकार जातले. धांवप, पेवप आनी सायकल चलोवप ह्या तीन गजालींचो ह्या थ्रायथलॉनांत आसपाव आसा.
शुक्रारा पणजे आयर्नमॅन हे सर्तीचो जर्सी आनी मॅडल उक्तावण सुवाळ्या जालो. बॉलीवूड आनी तामीळ अभिनेत्री सैयम्मी खेर, पर्यटन संचालक केदार नायक, हर्बालायफ इंडीयाचे वेवस्थापकी संचालक अजय खन्ना हांचे हस्तुकीं मेडल आनी जर्सीचें अनावरण जालें.
हे थ्रायतलोन सर्तींत १.९ किमी पेवप, ९० किमी सायकल चलोवप आनी २१.१ किमी धांवप हे तीन गजालींचो आसपाव आसतलो. इत्सूक तशेंच म्हालगडे खेळगड्यां खातीर ही सर्त उक्ती आसा. गोंय सरकार आनी आयर्नमॅन हांच्या जोडपालवान योस्का ही सर्त घडोवन हाडटा. आयतारा सकाळीं मिरामार दर्यादेगेर हे सर्तीचें उक्तावण जातलें.
सुवाळ्या वेळार उलयतना अभिनेत्री सैयमी थेक हांणी सांगलें, दर वर्सा आयर्नमॅन ७०.०३ गोवा, इंडीया ही सर्त उगडास करून दिता की ही जिद्द फक्त शरीरीक मर्यादे पुरती न्हय तर भावनीक आसा.
संवसारभरांतले एथलीट्स हे सर्तींत वांटेकार जावन आपली मर्यादेची परिक्षा घेतात ते पळोवन प्रेरणा मेळटा. एक एम्बसेडर आनी सर्तक म्हण शिस्त, ताकद आनी मोग मनोवपी समुदाया भितर वाटेकार जावप ही म्हजे खातीर अभिमानाची गजाल आसा, अशें मत सैयमी हांणी मांडलें.
गोंयांत संवसारीक दर्जाची खेळां सुविधा दिवपाची तांक आसा. दर वर्सा हे सर्तींत वांटेकार जावपी देश तशेंच देशा भायल्या एथसिट्सांची वाडटी संख्या दाखोवन दिता, अशें पर्यटन संचालक केदार नायक हांणी सांगलें.
आदारीतिथ्य, सोबितकाय आनी परब हे तीन गजालीं खातीर गोंयाची वळख आसा. मात आयर्नमॅन गोवा ७०.३ हे पांचवे आवृत्तीचे येजमानकी करून आमी गोंय हें फकत मनरीजवणीचें थळ म्हणूनच न्हय तर अंतरराष्ट्रीय खेळां पर्यटनाचें केंद्र म्हण आमी नावरुपांक हाडटात, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
