भांगरभूंय | प्रतिनिधी
मडगांव: आदिवासी संघटणा केपें हांचे वतीन देणगी कुपन येवजण उपक्रम हातांत घेतला. हातूंतल्यान समाजाच्या विकासाचीं कामां करतले. कुपन विक्रीची सुरवात आयतार 9 नोव्हेंबराक केपें पालिका गार्डन हांगा जातली अशी म्हायती संघटणेचे सचीव अॅड. जॉन फर्नांडीस हांणी दिली.
आदिवासी संघटणा केपें हांचे वतीन मडगांवां पत्रकार परिशद घेतली. या वेळार फर्नांडीस हांचे सयत अध्यक्ष कायतान कार्व्हालो, कामिलो सिमन्स बी मानेस्त हाजीर आशिल्ले.
ह्या वेळार आदिवासी संघटणा, केपेंचे सचीव जॉन फर्नांडीस हांणी लकी ड्रॉ येवजणेची म्हायती दिली.
आदिवासी संघटणा 2008 सावन केप्यां काम करता. दर वर्सा भोवमान सुवाळो, चर्चासत्रां, आदिवासी लोकोत्सव अशे खूबशे उपक्रम करतात. हे खातीर लोकां कडल्यान अर्थीक मजत घेवची पडटा. ताका लागून ह्या वर्सा देणगी कुपन येवजण सुरू केल्या. हाची सुरवात 9 नोव्हेंबर दिसा सकाळीं 10 वरांचेर केपें पालिका गार्डनांत जातली.
ह्या वेळार मंत्री रमेश तवडकार, मंत्री सुभाष फळदेसाय, विरोधी पक्ष फुडारी युरी आलेमांव, आमदार विजय सरदेसाय, आमदार निलेश काब्राल, आमदार एल्टन डिकॉस्टा, आदले आमदार चंद्रकांत कवळेंकार आनी हेर मानेस्त हाजीर आसतले. लोकोत्सव करपा खातीर कायमस्वरुपी सुवात आसची ह्या हेतान काम सुरू आसा अशें तांणी सांगलें.
कायतान कार्व्हालो हांणी सांगलें, आदिवासी संघटणा केपें हांचे कडल्यान पयलेच फावटी देणगी कुपन काडलां. हातूंत पयलें इनाम इनोव्हा क्रीस्टा आनी साडेइकरा लाख रुपया रोख, दुसरें इनाम ग्रँड व्हिटारा आनी स लाख रुपया रोख हे सारकीं 15 मोटारी आनी पांच दुचाकी अशी वट्ट 20 इनामां आसात. एसटी समाजाच्या विकासा खातीर हो उपक्रम हातांत घेतला. हातूंतल्यान समाजा खातीर विवीध कामां करतले अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
