भांगरभूंय | प्रतिनिधी
कोयर एकठांय करपी एजन्सींचो वाडटलो आंकडो
भांगरभूंय । प्रतिनिधी
पणजी : नगरपालिका, पंचायत कर्मचारी तशेंच हेर संबंदितांक कोयर वेवस्थापनाचें तंत्रीक गिन्यान दिवपाच्या हेताना खासा तंत्रीक अभ्यासक्रम सुरू जातलो. ह्या अभ्यासक्रमा खातीर प्रदुशण नियंत्रण मंडळ तशेंच डीएसडीई कडेन समजिकाय कबलात (एमओयू) करपाक मान्यताय दिल्या. घराघरांतलो कोयर एकठांय करपा खातीर आनीक एजन्सींची नेमणूक करपाचो निर्णय कोयर वेवस्थापन म्हामंडळान घेतला.
गोंय कोयर वेवस्थापन म्हामंडळाची बसका मुख्यमंत्री डॉ. प्रमोद सावंत हांचे फुडारपणा खाला जाली. कोयर वेवस्थापन खात्याचे मंत्री बाबूश मोन्सेरात आनी हेर अधिकारी बसकेक हाजीर आशिल्ले. हे बसकेक म्हत्वाचे निर्णय जालें.
शिक्षण संस्थां मदलो कोयर एकठांय करून तो पांच पद्दतीन वेगवेगळो करतले. सरकारी कार्यालयांनी कोयर वेवस्थापना खातीर डिस्पेन्सर्स आनी इंसिनिरेटर्स बसोपाचो निर्णय जालो. कुंकळ्ळी उद्देगीक वसणुकेंत सनरायज झींकचो घातक कोयर काडपाकूय मान्यताय दिली. ह्या घातक कोयराचो पिसुर्लेच्या प्रकल्पांत विलो लायतले. साळगांव आनी ताळगांवां ओल्या कोयराचे येरादारी खातीर गाडयांची वेवस्था जातली. पेट बाटल्यो रिसायकल करपा खातीर लेगीत थळाव्या संस्थाचे मजतीन प्रकल्प सुरू करपाक मान्यताय दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
