भांगरभूंय | प्रतिनिधी
दामू नायक : बंडखोरीची शक्यताय न्हयकारली
भांगरभूंय । प्रतिनिधी
पणजी : जिल्हो पंचायत वेंचणुके विशीं मुख्यमंत्री डॉ. प्रमोद सावंत हांणी मंत्री, आमदार तशेंच पदाधिकार्यांक मार्गदर्शन केल्ल्यान आरक्षण जाहीर जाल्या उपरांत पक्ष उमेदवारांची घोशणा करतलो, अशें भाजप प्रदेश अध्यक्ष दामू नायक हांणी सांगलां. इत्सूक चड आसले तरी उमेदवार निवड प्रक्रिये वेळार तांची समजूत काडपाक पक्षाक येस येतलें. हाका लागून बंडखोरी जावची ना, असो विस्वास तांणी उक्तायलो.
दामू नायक हांणी बिरेस्तारा पणजे पत्रकार परिशद घेतली. ह्या वेळार तांणी जिल्हो पंचायत वेंचणुकेचे तयारेची म्हायती दिली. पक्षान जिल्हो पंचायत वेंचणुकेची तयारी सुरू केल्या.
मतदार पडताळणी मोहिमे विशीं म्हायती दितना मुख्यमंत्री डॉ. प्रमोद सावंत हांणी मंत्री, आमदारांक जिल्हो पंचायत वेंचणुकेचे तयारे विशीं मार्गदर्शन केलें. कांय मतदारसंघांत इत्सूक उमेदवारांनी वावर सुरू केला. इत्सुकांनी वावर सुरू करप ही बरी गजाल आसा. राज्य वेंचणूक आयोगान अजून मेरेन आरक्षण निश्चीत करूंक ना. खंयचे मतदारसंघ बायलां खातीर वा ओबीसीं खातीर राखीव आसात, तें कळप गरजेचें. आरक्षण जाहीर जाले उपरांत उमेदवारांची घोशणा जातली. उमेदवारांची निवड चर्चा करून जातली. हाका लागून जांकां उमेदवारी मेळना, तांची पक्ष चर्चा करून समजूत काडटलो. हातूंत पक्षाक येस येतलें, असो विस्वास दामू नायक हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
