भांगरभूंय | प्रतिनिधी
थळाव्या सयत बिगर गोंयकाराचो खून
फरार कामगाराचेर पुलिसांचो दुबाव
वाठारांतल्या बिगर गोंयकारांची चवकशी सुरू
भांगरभूय । प्रतिनिधी
पणजी : साळगांवां बिरेस्तारा सकाळीं घडिल्ल्या दोन खुनांचे घडणुकेंत पुराय वाठारांत खवदळ पडलो. मुड्डोवाडो- साळगांव वाठारांतल्या रिचर्ड डिमेलो (गिरी बार्देस) हाचे सयत अभिषेक गुप्ता (इंदोर, मध्य प्रदेश) ह्या कामगाराचो खून केलो. पुलिसांनी घडणुकेचे सुवातेर धांव घेवन तपास सुरू केला. ह्या हत्या संबंदांत डिमेलो हाचो फरार जाल्लो फरार कामगार जगन्नाथाचेर पुलिसांनी दुबाव उक्तायला.
साळगांव पुलिसांनी दिल्ले म्हायती प्रमाण, भाड्याच्या बिराडाक रिडर्ड डिमेलो हाचो कामगार जगन्नाथ रावतालो. बिराडाचे पयशे मेळूंक नाशिल्ल्यान घर धनी जगन्नाथाक फोन करतालो. तो फोन उखलिना म्हणून घर धनी चवकशी करचे खातीर बिराडा कडेन गेलो. त्या वेळार ताका जनेल उक्तें आशिल्ल्याचें दिसलें, तशेंच कुडींत रगत दिसलें. ते उपरांत ताणें साळगांव पुलीस स्टेशनार वचून वयली म्हायती दिली.
साळगांव पुलीस निरिक्षक मिलिंद भुईंबर हाचे सयत पुलिसांनी घडणुकेचे सुवातेर धांव घेतली. दार उक्तें केलें तेन्ना भितर गळो चिरिल्ले अवस्थेंत दोगांच्यो कुडी सांपडल्यो. ते उपरांत अदीक चवकशी केली तेन्ना रिचर्ड डिमेलो आनी अभिषेक गुप्ता ह्या दोगांचो चाकू चोपून खून केल्ल्याचें मुखार आयलें. ते उपरांत पुलिसांनी दोगांच्योय कुडी ताब्यांत घेवन बांबोळेच्या जीएमसीच्या मड्यां कुडींत दवरल्यात. मजगतीं, पुलिसांनी घडणुकेचे सुवाते वयल्यान चाकू, सोऱ्याच्यो बाटल्यो आनी हेर वस्तू जप्त केल्यात. तेचवरी फॉरेन्सीक तज्ञांक आपोवन पुरावे एकठांय केले.
मुळाव्या तपासांत मध्यानरात ते फांतोड ह्या काळांत दोगांक मरण आयिल्ल्याचो अदमास पुलिसांनी उक्तायला. घडणुकेचे सुवातेर व्हड प्रमाणांत रगताचे दाग, तशेंच संघर्शाच्यो खुणो सांपडिल्ल्यान ही हत्या नियोजन करून केल्ल्याचो दुबाव पुलिसांनी उक्तायला.
पुलिसांनी अदीक चवकशी केली तेन्ना, बिराडाक रावपी जगन्नाथ फरार आसा अशें कळ्ळें. पुलिसांनी ह्या खून प्रकरणांत ताचेर दुबाव उक्तायला.
रिचर्ड डिमेलो हो सावंड सिस्टम भाड्याक दिवपी वेवसायीक आशिल्लो. जाल्यार जगन्नाथ ताचे कडेन टॅक्निशियन म्हूण काम करतालो. कामगार जगन्नाथ ते कुडींत बिराडाक रावतालो. डिमेलोचेय ताचे कडेन येवप- वचप आशिल्लें. तशेंच कांय खेपे तो थंय रावतालो. फरार कामगार जगन्नाथ मध्य प्रदेशांतल्या अभिषेक गुप्ता हाका बुधवारा रातीं गोंयांत घेवन आयिल्लो. त्या वेळार रिचर्डा सयत तिगूय कुडींत सोरो पियेल्ल्याचें पुरावे पुलिसांक सांपडल्यात.
फरार कामगाराचो पुलीस सोद घेतात. तो मेळ्ळे उपरांत खुनाचो गूट सुटावो जातलो, अशी म्हायती पुलिसांनी दिली.
पुलीस म्हानिरिक्षक केशव राम चौरासिया हाचे सयत उत्तर गोंय पुलीस अधिक्षक राहुल गुप्ता, उपअधिक्षक विश्वेस कर्पे हांणी घडणुकेचे सुवातेक भेट दिली. ह्या वाठारांत रावपी बिगर गोंयकार कामगारांची पुलिसांनी चवकशी सुरू केल्या. ह्या हत्ये फाटल्यान वैयक्तीक दुस्मानकाय, कामाचे सुवातेर जाल्लो वाद वा अर्थीक कारण आसूं येता, असो पुलिसांक मुळावो अदमास आसा. पुलिसांनी आशिकुशीच्या सीसीटीव्ही फुटेजीचो सोद घेवपाक सुरवात केल्या. तशेंच मोबायल कॉल रेकॉर्ड आनी थळाव्या साक्षीदारांचे म्हायती वयल्यान तपासाचे धागेदोरे मेळोवपाचो यत्न सुरू केला.
वावड्यांचेर विस्वास दवरूं नाकात : पुलीस
घडणुके उपरांत साळगांव वाठारांत तणावाचें वातावरण निर्माण जालां. पुलिसांनी लोकांक शांतिकाय राखपाचो आनी वावड्यांचेर विस्वास दवरचो न्हय, असो उलो मारला. दोनूय कुडी पोस्टमार्टमा खातीर जीएमसींत धाडल्यात. पोस्टमार्टम अहवाल आयले उपरांतूच खुनाचें नेमकें कारण स्पश्ट जातलें, अशें पुलिसांनी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
