भांगरभूंय | प्रतिनिधी
पणजी: उत्तर गोंयांत उपजिल्लोधिकारी आनी वीज खात्यांतल्या एका सहाय्यक अभियंत्यामदीं जाल्ल्या वादाक लागून बरोच बोवाळ निर्माण जाला. वेंचणूक ड्युटीचेर (बीएलओ सुपरवायझर) हाजीर रावंक नाशिल्ल्यान उपजिल्लोधिकार्यांच्या आदेशा प्रमाण वीज अभियंत्याक सरळ ताब्यांत घेतलो.
नेमकें प्रकरण कितें?
स्वप्नील वालावलकार नांवाचे सहाय्यक अभियंते कोळवाळ सब-स्टेशनांत कार्यरत आसात. तांची ’स्पेशल इन्टेन्सिव्ह रिव्हिजन’ ड्युटी खातीर नियुक्ती केल्ली. मात, ते हे ड्युटीचेर गैर हाजीर रावले. ह्या प्रकरणांत उपजिल्लोधिकारी तशेंच उपविभागीय दंडाधिकारी सुयश खांडेपारकार हांणी सेगीत आपोवनूय वालावलकार हाजीर जावंक ना. हाका लागून खांडेपारकार हांच्या निर्देशा प्रमाण कोलवाळ पुलिसांनी ह्या अभियंत्याक सरळ तांच्या सबस्टेशनांतल्यान ताब्यांत घेतलो.
हे घडणुकेची म्हायती मेळटांच समाजीक कार्यकर्ते काशीनाथ शेट्ये हांणी बिरेस्तारा सकाळीं उत्तर गोंय जिल्लोधिकारी कार्यालयांत धांव घेतली. तांणी ह्या पुराय प्रकरणाची स्पश्टता आनी प्रशासकीय अधिकार्यांचे भुमिकेंत पारदर्शकताय आसची अशी मागणी केली. हे घडणुकेक लागून वीज खात्यांतल्या अधिकार्यांनीय खर चिंता उक्तायल्ल्याचें वृत्त आसा. सामकें म्हत्वाच्या सेवे खाला येवपी सरकारी कर्मचार्याक वेंचणूक ड्यूटी कित्याक? ते खातीर खात्यांत हेर कर्मचारीय आशिल्ले असो मुद्दो काशीनाथ हांणी हाजीर केलो.
कॉंग्रेसीचो जिल्लोधिकारी कार्यालयाचेर मोर्चा
मजगतीं, हे घडणुके उपरांत राजकीय वातावरणूय तापलां. गोवा प्रदेश कॉंग्रेस कमिटीचे अध्यक्ष अमित पाटकार हांच्या नेतृत्वाखाला कॉंग्रेस फुडार्यांनी जिल्लोधिकारी कार्यालया मुखार नेटान आंदोलन केलें.
पाटकर हांणी ह्या डिटेंशनाचेर आक्षेप घेतलो. एका सरकारी कर्मचार्याक फकत दुसर्या सरकारी अधिकार्याच्या आदेशावेल्यान कशें ताब्यांत घेवपाक शकता? असो प्रस्न तांणी हाजीर केलो. तशेंच, जिल्लोधिकार्यांचो हो आदेश राजकीय हेतून प्रेरित आशिल्लो काय, असोय दुबाव तांणी उक्तायलो.
उपजिल्लोधिकारी आनी पुलिसां कल्यान ह्या ब्रकरणाचे फुडले तपशील येवपाचे आसात, ह्या प्रशासकी संघर्शान गोंयच्या सरकारी कर्मचार्यांच्या ड्युटी आनी अधिकारांचेर एक नवो वाद उबो केला..
मजगतीं, वीज खात्याक एखाद्या दुसर्या अभियंत्याची कायम गरज आसतली, जाल्यार मतदार पडताळणीच्या कामा खातीर तांचे सुवातेर अधिकारी पदाचेर दुसर्या अभियंत्याचें नांव दिवचें, अशें पत्र मुखेल वीज अभियंत्याक धाडिल्लें. ह्या पत्राक मुखेल वीज अभियंत्या कडल्यान कसलोच प्रतिसाद मेळूंक ना, हाका लागून हो प्रस्न निर्माण जाल्ल्याचें उत्तर गोंयचे जिलोधिकारी अंकित यादव हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
