भांगरभूंय | प्रतिनिधी
बंडखोरीची शक्यताय पक्षान न्हयकारली
पणजी : जिल्लो पंचायत वेंचणुकेविशीं मुख्यमंत्री डॉ. प्रमोद सावंत हांणी मंत्री, आमदार तशेंच पदाधिकार्यांक मार्गदर्शन केल्ल्यान आरक्षण जाहीर जाल्या उपरांत पक्ष उमेदवारांची घोशणा करतलो, अशें प्रदेश भाजप अध्यक्ष दामू नायक हांणी सांगलां. इत्सूक चड आसले तरी उमेदवार निवड प्रक्रीये वेळार तांची समजूत काडपाक पक्षाक येस येतलें. हाका लागून बंडखोरी जावची ना, असो विस्वास तांणी उक्तायलो.
प्रदेश भाजप अध्यक्ष दामू नायक हांणी आयज पणजे पत्रकार परिशद घेतली. ह्या वेळार तांणी जिल्लो पंचायत वेंचणुकेचे तयारेची म्हायती दिली. पक्षान जिल्लो पंचायत वेंचणुकेची तयारी सुरू केल्या.
मतदार पडताळणी मोहीमेविशीं म्हायती दितना मुख्यमंत्री डॉ. प्रमोद सावंत हाणी मंत्री, आमदारांक जिल्लो पंचायत वेंचणुकेचे तयारे विशीं मार्गदर्शन केलें. कांय मतदारसंघांत इत्सुक उमेदवारांनी वावर सुरू केला. इत्सुकांनी वावर सुरू करप ही बरी गजाल आसा. राज्य वेंचणूक आयोगान आजून मेरेन आरक्षण निश्चीत करूंक ना. खंयचे मतदारसंघ बायलां खातीर वा ओबीसीं खातीर राखीव आसा, तें कळप गरजेचें. आरक्षण जाहीर जाले उपरांत उमेदवारांची घोशणा जातली. उमेदवारांची निवड चर्चा करून जातली. हाका लागून जांकां उमेदवारी मेळना, तांची पक्ष चर्चा करून समजूत काडटलो. हातूंत पक्षाक येस येतलें, असो विस्वास दामू नायक हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
