भांगरभूंय | प्रतिनिधी
भा रत ही इतिहासीक भूंय आसा ही गजाल भारतीय बायलां क्रिकेट पंगडान संवसाराक दाखोवन दिली. भारतीय बायलां क्रिकेट पंगड 2005 आनी 2017 वर्सा फायनलींत पाविल्लो. पूण थोड्याशा अंतरान हार घेवची पडली. तरी लेगीत भारतीय पंगडान धीर सोडलो ना आनी आपली आक्रमकताय मुखार सुरूच दवरली आनी खर कश्टा उपरांत 2 नोव्हेंबराक म्हणल्यार एकादशीक जैताच्या रुपांत पंढरपूरचो पांडुरंगूच अवतरिल्ल्याचें दिसून आयलें. सात फावटी संवसारीक वस्ताद थारिल्ले ऑस्ट्रेलियेक सेमी फायनलींत हारोवन जणूं देवकीचो आठवो पूत साक्षात श्रीकृष्णाचो जल्म बायलां क्रिकेट पंगडाच्या रुपांत जावन ऑस्ट्रेलियेक आडायली आनी फायनलींत प्रवेश करून दक्षीण आफ्रिकेक हारोवन पुराय संवसारभर आनंदोत्सवाची जैतिवंताची घुडी उबारली. आतां भारतीय पंगडाचो आत्मविस्वास वाडला. पंगडान सिद्ध करून दाखयलें की संघर्श, जिद्द, जिज्ञासा आनी चिकाटी आसत जाल्यार जैता पसून कोणूच आडावंक शकना, आनी भारतीय पंगडान तेंच केलें आनी जैत निश्चीत केलें हें पुराय संवसारान चान्न्याच्या उजवाडांत आपल्या उक्त्या दोळ्यांनी पळयलें.
कारण हाचे पलयींच्या मॅचीं विशीं तांकां कल्पना आशिल्ली की आमी हारलेनात जाल्यार फुडले वाटचालीचो मार्ग मेकळो करीत आसात आनी हो संघर्शमय प्रवास हांगा थांबिल्लो नासून दरेक संघर्शाक जशाक तशी जाप लेगीत दिली आनी ह्याच संघर्शांतल्यान 2 नोव्हेंबर 205 दिसा लखलखत्या गिऱ्यांच्या उजवाडांत सगली कडेन प्रकाशमय वातावरण निर्माण करून भारताच्या पदरांत इतिहासीक जैताची ज्योत प्रज्वलीत जाली. कारण भारतीय इतिहासांत वर्स 2025 बायलां क्रिकेट पंगडाचे बाबतींत भांगराच्या अक्षरांनी बरयतले. संवसारीक करंड जिखपा खातीर फायनलींत पावप म्हणल्यार काट्यांनी भरिल्ले वंयेंतल्यान प्रवेश करप आशिल्लें आनी ही वंय भारतीय पंगडान हुपली. कारण सात फावटी ऑस्ट्रेलियान संवसारीक करंड जिखिल्लो आनी ते पद्दतीन तांची पकड घटमूट लेगीत आशिल्ली. पूण भारतीय बायलां क्रिकेट पंगडाच्या दरेक खेळगडयेची खर नदर ऑस्ट्रेलिया पंगडाच्या दरेक खेळगडयेचेर आशिल्ली.
भारताची घातक बॉलींग, उत्कृश्ट बॅटींग आनी दोळेदिपकावपी फिल्डींग हाचे मुखार ऑस्ट्रेलिये सारक्या बलाढ्य पंगडाक सेमी फायनलींत हार घेवची पडली. जाल्यार दुसरे वटेन आफ्रिकेन चार फावटी संवसारीक करंड वस्ताद थारिल्ल्या इंग्लडाक हारोवन फायनलींत पावल घालें. ताका लागून फायनलींत केन्नाच पावूंक नाशिल्लो आफ्रिका पंगड आनी तिसरे फावटी फायनलींत पाविल्लो भारत हांचे मदीं नवी मुंबयच्या डी. वाय. पाटील स्टेडियमार निमाणी मॅच रंगतदार जाली. हे फायनलींत खूबशे चड उतार आमकां पळोवंक मेळ्ळे. अशे परिस्थितींत भरतीय बायलांनी आपली पुराय ताकद लायली. कारण तांचे मदीं दृढ संकल्प आशिल्लो की ‘अभी नही तो कभी नही’ ताका लागून दरेक खेळगडयेन आपापली सटीक भुमिका आनी योग्य भुमिका बजायली आनी खूबसो पयस आशिल्लो संवसारीक करंड आपले मुठींत घेतलो. भारतीय बायलां पंगडान संवसार जिखपाक सुमार 47 वर्सां लागलीं. हाचे वेल्यान भारतीय बायलां क्रिकेट पंगडान सिद्ध करून दाखयलें की जें कितें घडोवपाचे आसत आनी मेळोवपाचें आसत जाल्यार संघर्श करप गरजेचो आसा आनी ताचेंच फळ आसा की बळिश्ट पंगडाक सेमी फायनलींत हारोवन फायनलींत पावून भारत संवसारीक वस्ताद थारलो.
हातूंत आमकां थोडे उतार चडाव लेगीत पळोवंक मेळ्ळे. जेमिमा रॉड्रिग्साक पेड्डेर फॉर्माक लागून सुरवातीच्या मॅचींतल्यान भायर बसयिल्लें. त्याच जेमिमान ऑस्ट्रेलिये आडचे सेमी फायनलींत 127 धांवड्यांचो नाबाद खेळ करून ऑस्ट्रेलियन पंगडाक मातयेभरवण करून फायनलींत पावयलें. जेमिमाक म्हजो सलाम, जेमिमान फायनलींत 24 धांवड्यांचें म्हत्वपूर्ण योगदान दिलें. न्युझिलॅण्डा आड करात वा मरात अशा कठीण प्रसंगा वेळार ताणें 76 धांवड्यांचो म्हत्वपूर्ण खेळ केलो. अशे तरेन जेमिमान संवसारीक करंड जिखपाक मोलाचें योगदान दिलें.
असोच चड उतार शेफाली वर्माचे बाबतींत दिसून आयलो. शेफाली वर्माक पेड्डेर फॉर्माक लागून एका दिसाच्या पंगडांतल्यान ऑपनर शेफाली वर्माक एका वर्सा पयलीं काडून उडयिल्ली. ताची ह्या संवसारीक करंड पंगडांतूय निवड जावंक नाशिल्ली. 26 ऑक्टोबराक भारताची नियमीत ऑपनर प्रतिका रावल बांगलादेशा आडचे मॅचींत जखमी जाली. दुखापतीक लागून बदली खेळगडी म्हूण शेफालीचो पंगडांत आस्पाव केल्लो. तिणें फायनलींत मोलाचें योगदान दिवन 87 धांवड्यांचो खेळ केलो आनी जैताची घोडधांव लागीं हाडली. उपरांत दोन म्हत्वाच्यो विकेटी लेगीत घेतल्यो आनी देशाक संवसारीक करंड जिखून दिलो. हे कामगिरी खातीर तिका प्लेयर ऑफ द फायनलीचो मानाचो पुरस्कार मेळ्ळो. अशे तरेन शेफालीन संघर्शमय आनी जिद्दीची कामगिरी करून संवसार जिखलो.
भारतीय पंगडाची स्टार ऑलरावंडर दीप्ती शर्माक 2025च्या बायलां संवसारीक करंडांत बॅट आनी बॉल ह्या दोनूय मळार उत्कृश्ट कामगिरी खातीर प्लेयर ऑफ द सिरीज म्हूण भोवमानीत केलो. दीप्तीन 9 मॅचींनी 215 धांवड्यो काडल्यो आनी 22 विकेटी घेतल्यो. ती सर्तींत सगल्यांत चड विकेटी घेवपी बॉलर थारली. अशे तरेन लीग मॅची, सेमी फायनल आनी फायनल गांठपा खातीर दरेक खेळगडयेन दोळ्यांत तेल घालून मोलाचें योगदान दिलें आनी भारतीय बायलां क्रिकेट पंगडान संवसारीक करंडाचेर भांगरा अक्षरांनी नांव कोरांतून भारतीय चलयांनी इतिहास घडयलो आनी संवसारीक वस्ताद थारलीं.
सुमार 47 वर्सां उपरांत आफ्रिकेक 52 धांवड्यांनी हारोवन दिवाळी मनयली. बायलां एका दिसाची संवसारीक करंड सर्त जिखपी भारत हो चौथो पंगड थारलो. हाचे आदीं ऑस्ट्रेलियेन सात फावटी, इंग्लंडान चार फावटी जाल्यार न्युझिलॅण्डान एकदां संवसारीक करंड जिखला.
भारतान 50 ओव्हरींनी 7 बाद 298 अशी धांवसंख्या उबारली. ताचो फाटलाग करीत दक्षिण आफ्रिकेची मुखेली लॉरा वोल्वार्ड क्रिझीर आसा मेरेन दक्षिण आफ्रिकेक जैताची आस्त आशिल्ली. पूण दीप्ती शर्मान घातक बॉलींग करून वोल्वार्डाची विकेट घेतली आनी भारताक जैताचें लागीं हाडलें. निमाणें दीप्तीच्या बॉलिंगेचेर नदीन डी क्लर्काच्यो 18 धांवड्यो आसतना मुखेली हरमनप्रीत कौरान सोबीत कॅच घेवन भारताच्या पयल्या संवसारीक करंडाचेर म्होर मारली. अशे तरेन पुराय खेळगडयांच्या योगदानान इतिहासीक जैत हातासलें आनी 140 कोटी जनतेचें मन खोशयेन भरून आयलें. पुराय खेळगडयो, कोच आनी टीम मॅनेजमेंट हांचे येस म्हणल्यारच भारताचें अप्रतीम जैत. पुराय बायलां क्रिकेट पंगडाक म्हजो सलाम. जय हिंद, जय भारत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
