भांगरभूंय | प्रतिनिधी
आनी सरकार जर अशीच मजन करीत रावलें तर खुबशें जाण जाचें कांयच लुकसाण जवंक ना तेय बी हाचो फायदो घेतले.
मे म्हयन्याचे पांच तारखेक तूं आयिल्लो. अचकीत येवन तुवें सगल्यांकूच सुखाचो धपको दिलो, गरमीत तापिल्याक तुंवें शितळ थंडाय दिली, वतांत करपून गेल्ल्या झाडांक नवी पालवी हाडूंक मजत केली, शेतकामत्यांक शेतांत काम करपाक उर्बा दिली, तानेल्ल्या मोनजातीची तान भागयली, धर्तरी पाचवी पाचवी केली…..अशें तरेन अविरत तूं येत रावलो. तुज्या येण्यान थोड्या वेळा खातीर सैम सुकावलें. शेतांत भात पिकाची लागवण करून शेतकामत्याचो हुस्को मेकळो केलो, सगळीं धरणां भरून लोकां खातीर उदकाचो सांठो केलो. तळयो भरून तुज्या येण्याचो उद्देश सिद्ध केला, जितल्या वेळा खातीर तुका येवचो आशिल्लो तो वेळ केन्नाच पुराय जावन गेलो, पूण तूं माता परतून वचपाक विसरलो.!
हय पावसा, तुजीच गजाल करता हांव! हांवूंच न्हय तर हे धर्तरेर जायते जाण तुज्यो गजाली करतात, थोडे तुका गाळींचो शिंवर घालतात, तर कांय जाण तुका शिरापूय दितात, त्या पावसान कितें चिंतलां काय म्हणटात, वर्सूय भर पडपाचें थारायलां अशें म्हणटात, शेतकामती तर आपले तकलेर हात धरून बसला. ह्या पावसान तर आमची सामकीत वाट लायली, रिणा काढून शेतां रोयली आनी कापणेच्या वेळार पावसान लुटलें अशें म्हणटात.
हें पळय पावसा तूं म्हजो बरो आनी खरो इश्ट, देखून हांव तुका एक गुटाची गजाल सांगता. हावें अशें आयकलां की तुज्या येण्यान. म्हणचे वेळा भायल्या ह्या तुज्या येण्यान खुबशां शेतकामत्यांच्या भात पिकाचें लुकसाण जालां. ह्या लुकसाणाचो जापसालदार ते तुका थारायता आनी ती भरपाय तांकां सरकारान भरून दिवची अशी ते मागणी करतात. आतां म्हाका सांग तूं पावसा, सरकार कोणाक कोणाक म्हणून मजत करतलें? आनी सरकार जर अशीच मजन करीत रावलें तर खुबशें जाण जाचें कांयच लुकसाण जवंक ना तेय बी हाचो फायदो घेतले. तेन्ना उपकार करून तशें जावंक दिवं नाका! मनीस वागता म्हणून तूं तसो वागू नाका! मनशांनी आपलें मनिसपण सोडलें तरी तूं तुजें कर्तव्य विसरू नका! मनशांनी आपल्या स्वार्था खातीर स्वताचें अस्तित्व घाणाक दवरलां, पूण तूं तुज्या अस्तित्वाची राखण कर. पावसा, आतां तरी पुरो कर…!
अविनाश कुंकळकार
7875237830
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
