जमीन हडप प्रकरणांत आरोपपत्र दाखल

भांगरभूंय | प्रतिनिधी

10 नोव्हेंबराक जातली फुडली सुनावणी

पणजी: हणजूण्यां सर्वे क्रमांक 426/15तली जमीन हडप प्रकरणांत गोंय पुलिसांच्या विशेश तपास पंगडान (एसआयटी) मुखेल सुत्रधार विक्रांत शेट्टी आनी मोहम्मद सुहैल उर्फ मायकल फर्नांडीस हांचे सयत कायतान फर्नांडीस, ताची घरकान्न मीना कायतान फर्नांडीस, राजकुमार मैथी आनी डेन्वर डिसोझा हांचे आड म्हापशेंच्या पयलो वर्ग न्यायालयांत आरोपपत्र दाखल केलां. ह्या प्रकरणांत न्यायालयान दखल घेवन फुडली सुनावणी 10 नोव्हेंबर दिसा दवरल्या.

ह्या प्रकरणांत हणजूणचो जस्टीन राफेल डिसोझा हांणी एसआयटी कडेन कागाळ दाखल केल्या. तेप्रमाण मुखेल सुत्रधार विक्रांत शेट्टी हाचे सयत लुईझा मारिया डायस, कायतानो फर्नांडीस आनी मीना नायक ह्या दुबावितांनी 2 सप्टेंबर 2020 पयली कागाळदाराच्या पुर्वजांची हणजूणची सर्वे क्रमांक 426/15तली 8,750 चौखण मिटर जमनींचें बनावट वारसदार प्रमाणपत्र आनी हेर दस्तावेज तयार केले.

दुबावितांनी संबंदीत सरकारी कचेरेंत बनावट दस्तावेज सादर करून मालमत्तेचें हस्तांतरण करून घेतलें. ह्या कागाळीची दखल घेवन एसआयटीचे तेन्नाचे मुखेली तशें पुलीस अधिक्षक निधीन वाल्सन हांच्या मार्गदर्शना खाला पुलीस निरिक्षक सखाराम परब हांणी दुबावितां आड भा.दं.सं.च्या कलम 465, 466, 467, 471, 419, 420 व 120 बी खाला गुन्याव दाखल केल्लो.

दुबावीत शेट्टी हाणें उत्तर गोंय जिल्हो आनी सत्र न्यायालयांत दाखल केल्लो अटकपूर्व जामीन अर्ज भायरायले उपरांत तो फरार जाल्लो. एसआयटीन शेट्टीक हणजूण वाठारांतल्यान तेन्नाचे निरिक्षक सखाराम परब हांच्या फुडारपणा खालच्या पंगडान अटक करून कारवाय केल्ली.

ह्या प्रकरणांत मुखेल सुत्रधार मोहम्मद सुहैल उर्फ मायकल फर्नांडीस आनी राजकुमार मैथीक अटक करून कारवाय केली.

मजगतीं, ह्या प्रकरणांतलो दुबावीत राजकुमार मैथी आनी डेन्वर डिसोझा हे दोगूय फरार आसात. ह्या प्रकरणाचो तपास पुराय केले उपरांत एसआयटीन म्हापशेंच्या पयलो वर्ग न्यायालयांत आरोपपत्र दाखल केलां. हाची दखल घेवन न्यायालयान फुडली सुनावणी 10 नोव्हेंबर दिसा दवरल्या.