भांगरभूंय | प्रतिनिधी
मडगांव: फाटले कितलेशेच म्हयने दुरुस्तीचें काम सुरू आशिल्ल्या मडगांव रवींद्र भवनाच्या पाय तियात्रिस्त मुखेल सभाघर तशेंच ब्लॅक बॉक्साचें काम पुराय जालां. ह्या नुतनीकरण केल्ल्या सभाघराचें परतून लोकार्पण मुख्यमंत्री डॉ. प्रमोद सावंत हांचे हस्तुकीं जालें.
मडगांव रवींद्र भवनांतल्या पाय तियात्रिस्त सभाघराचें तशेंच ब्लॅक बॉक्साचें नुतनीकरणाचें काम 30 ऑक्टोबर दिसा पुराय केल्लें. त्या सभाघराच्या नुतनीकरणा उपरांतचें लोकार्पण मुख्यमंत्री डॉ. प्रमोद सावंत हांचे हस्तुकीं काल (बुधवारा) जालें. ह्या वेळार भौशीक बांदकाम मंत्री दिगंबर कामत, कला आनी संस्कृती मंत्री रमेश तवडकार, आमदार उल्हास तुयेंकार, आमदार आलेक्स रेजिनाल्ड आनी हेर अधिकारी हाजीर आशिल्ले.
ह्या वेळार मुख्यमंत्री डॉ. सावंत हांणी सांगलें की, मडगांवच्या रवींद्र भवनांतली देखभाल दुरुस्तीच्या कामां खातीर ब्लॅक बॉक्स आनी पाय तियात्रिस्त हॉल हांची कामां झुजापांवड्यार पुराय करपाचो निर्णय घेतिल्लो. मंत्री दिगंबर कामत, मंत्री रमेश तवडकार हांणी ह्या कामाचेर देखरेख दवरिल्ली. सुमार दोन कोटींचो खर्च ह्या कामां खातीर करून नुतनीकरणाचें गरजेचें तें काम केलां. एनएक्स इमारतीचें काम फाटलीं खूबशीं वर्सां प्रलंबीत आशिल्लें. सुमार आठ ते धा वर्सा ह्या इमारतीचें काम जावपाचें आशिल्लें. त्या इमारतीच्या बादाकामाचेंय काम आतां हातांत घेतलां ताचें काम पुराय जाले उपरांत रवींद्र भवनाचें सभाघर आनी एनएक्स इमारत ह्या दोनूय कडेन कला आनी सांस्कृतीक कार्यावळी खातीर उपेगांत हाडूंक मेळटल्यो अशेंय डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
