भांगरभूंय | प्रतिनिधी
पणजीः दर्यादेगेर शॅक आनी हॉटेला भायर खाटी आनी सत्र्यो लावपाक परवानगी दिवपी अर्ज पर्यटन खात्यान उक्ते केल्यात. खर नेम आनी अटी लागू करून शॅक आनी हॉटेल धनयांक परवानगी दितले अशी सुचोवणी पर्यटन खात्यान केल्या.
पर्यटन खात्यान परिपत्रकां जारी करून गोंय राज्य शॅक आनी डेक बेड धोरण, 2023-2026चे संबंदींत तरतुदी प्रमाण नमूद केल्ल्यो अटी आनी नेमांक पाळो दिवन येता त्या पर्यटन हंगामा खातीर डेक बेड्स (खाटी), सत्र्यो, मेजां आनी कदेली दवरपाची परवानगी मेळोवपा खातीर पात्र खाजगी शॅक धनी तशेंच नोंदणीकृत रेस्टॉरंण्ट्स आनी हॉटेल्स धनया कडल्यान अर्ज मागयल्यात.
ह्या अर्जाचे फॉर्म पर्यटन खात्याच्या संबंदीत प्रादेशीक सुविधा केंद्रांचेर तशेंच खात्याची वॅबसायट www.goatourism.gov.in हाचेर 5 नोव्हेंबर 2025 ते 30 नोव्हेंबर 2025 मजगतीं उपलब्द आसतले.
अर्ज फक्त परवानोधारक खासगी शॅक ऑपरेटर तशेंच सध्याच्या हंगामा खातीर पर्यटन खात्या कडेन वैध परवान्या सयत नोंदणीकृत आशिल्ल्या हॉटेल्स आनी रेस्टॉरंण्ट्सां कडल्यान स्विकारतले. परवान्यात निश्चीत केल्ल्या क्षेत्रांतूच डेक बेड्स, सत्र्यो, मेजां आनी कदेली दवरपाक मेकळीक आसतली. परवानो धारकांनी हें क्षेत्र 2 फूट उंचाये मेरेन वंय घालून निश्चीत करचें तशेंच पर्यटकांक हालचाली करतना आडमेळीं जावची न्हय हे खातीर चारूय वटांनी किमान एका मिटराचो प्रवेश मार्ग निश्चीत करचो.
पर्यटन हंगाम सोंपले उपरांत सगले डेक बेड्स, सत्र्यो, मेजां आनी कदेली रोखड्योच काडच्यो पडटल्यो.
प्रत्येक डेक बेडच्या संचाचेर संबंदीत शॅक, हॉटेल वा रेस्टॉरंण्टाच्या परवानो क्रमांका कडेन तुळपी रंग लायिल्लो आसपाक जाय. डेक बेड्स हे शॅक, हॉटेल वा रेस्टॉरंण्टाचे सुवाते मुखार भायले शिमे पसून दर्यादेगेच्या 15 मिटरा भितर वा पर्यटन खात्यान निश्चीत केल्ल्या क्षेत्रांत, दर्याच्या उच्च भरती रेशेच्या निर्बंधांचें पालन करून दवरपाक जाय. पर्यटक, जीवरक्षक, दर्यागेचेर नितळसाण करपी कर्मचारी वा कायदो अंमलबजावणी संस्थांचे हालचालीत कसलीच आडखळ येवची ना हाची खात्री परवानो धारकांनी करून पर्यटन खात्यान विहीत केल्ली नितळसाण, भलायकी आनी आचारसंहिता हाका खरपणान पाळो दिवपाक जाय.
मंजूर केल्लें क्षेत्र फक्त अधिकृत पर्यटन-संबंदीत कामां खातिरूच वापरचें. सरकाराच्या निर्णया प्रमाण वा विहीत केल्ले अटींक पाळो दिलो ना जाल्यार, दिल्लो परवानो खंयच्याय खिणाक रद्द करतले अशी शिटकावणी पर्यटन खात्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
