भांगरभूंय | प्रतिनिधी
पुंडलिक नायक : विमला पै विश्व कोंकणी जीवन-सिद्धी सन्मान भेटयलो
भांगरभूंय । प्रतिनिधी
पणजी : आपूण केन्नाच पुरस्कारा फाटल्यान धांवलो ना. पुरस्कार आपले फाटल्यान आयले, अशें नामनेचे कोंकणी लेखक पुंडलिक नायक हांणी सांगलें.
कोंकणी साहित्य, नाट्य, आनी सांस्कृतीक मळार दिल्ल्या आजीवन योगदाना खातीर नामनेचे नाटककार, कवी, लेखक पुंडलिक नायक हांका अंदूंचो विमला व्ही. पै जीवन-सिद्धी सम्मान भेटयलो. कोंकणी भास, संस्कृताय आनी चळवळींत नायक हांच्या गिरेस्त योगदाना खातीर हो पुरस्कार तांकां प्रदान केलो, अशें संस्थे वतीन कळीत केलां. ह्या भोवमानाक जाप दितना पुंडलिक नायक उलयताले. तांणी फाटल्यो कांय यादी सांगल्यो. तशेंच जीवन सिद्धी पुरस्कार भेटयिल्ले खातीर विश्व कोंकणी केंद्राचे तांणी उपकार मानले.
1 नोव्हेंबराच्या मुखेल सुवाळ्याक हाजीर रावंक मेळूंक नाशिल्ल्यान विश्व कोंकणी केंद्राचे अध्यक्ष नंदगोपाळ शणै हांच्या निर्देशा खाला आनी उपाध्यक्ष डॉ. किरण बुडकुले हांच्या मार्गदर्शना खाला जाल्ल्या ल्हानश्या सुवाळ्यांत पुंडलिक नायक हांकां हो पुरस्कार तांच्या घरा भेटयलो. शाल, हार, मानचिन्न आनी एक लाख रुपयांचो चेक अशें ह्या पुरस्काराचें स्वरुप आसा. ह्या वेळार विश्व कोंकणी केंद्राची उपाध्यक्ष डॉ. किरण बुडकुले, ज्येश्ठ नाट्य दिग्दर्शक, कलाकार श्रीधर कामत बांबोळकार, साहित्य अकादेमी पुरस्कार प्राप्त लेखिका हेमा नायक, कवी उदय म्हांबरो, हरेकल पुंडलीक पै तशेंच कवयित्री नूतन साखरदांडे हाजीर आशिल्ली.
राजभास आंदोलनाच्या 555 दिसांच्या कोंकणी भास आनी चळवळी वेळार पुंडलीक नायक हांणी केल्ल्या फुडारपणाचेर ह्या वेळार वक्त्यांनी भर दिलो. कोंकणीक राजभास म्हूण मान्यताय मेळोवपा खातीर केल्ल्या येसस्वी आंदोलनांत कोंकणी प्रजेचो आवाजाचें टिकावू फुडारपण हो तांचो म्हत्वाचो वावर. तशेंच सगल्या थरांतल्या कोंकणी तरणाट्यांक कोंकणी साहित्य चळवळींत वांटेकार करून घेवन प्रतिभावान तरणाट्यांची शक्त तांणी उबारली, अशें डॉ. बुडकुले हांणी म्हणलें. युगांक नायक हांणी येवकार दिलो. म्हांबरो हांणी कार्यावळीचो उद्देश आनी केंद्रबिंदू सांगून प्रास्तावीक केले. श्रीधर कामत बांबोळकार हाणी पुंडलीक नायक हांचो गौरव करपी उलोवप करतना तांच्या लेखन, नाट्य चळवळींतल्यो यादी जागयल्यो. ह्या वेळार डॉ. जयंत बुडकुले, गीता कामत बांबोळकार तशेंच राजेंद्र नायक, महादेव नायक, हिरू नायक, सुकांती नायक, श्रीकांत नायक आनी बाबा प्रसाद आदी इश्ट परिवार हाजीर आसलो.
अशोक भोंसलो हांकां आर्गां
सुरवेक उदय म्हांबरो हांणी त्याच दिसा अंतरिल्ल्या स. अशोक भोंसलो हांच्या कोंकणी खातीर दिल्ल्या खडेगांठ योगदानाची उपस्थितांक याद करून दिली. ह्या वेळार तांकां आदरांजली म्हणून दोन मिनटां शांतताय पाळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
