भांगरभूंय | प्रतिनिधी
पणजी : राज्यांतली डम्प (उडोवपाची खण माती) मालाचे पावणे खातीर सरकारान ह्यान पयलींच सुधारीत धोरण तयार केलां. जानेवारी सावन पावणेक सुरवात जातली. जानेवारींत १० डम्पाची पावणी जातली. खण संचालक नारायण गाड हांणी ही म्हायती दिली.
राज्यांत खण वेवसाय नेटान सुरू जावचो, हे खातीर राज्य सरकार यत्न करता. ह्या यत्नाचो भाग म्हणून खण ब्लॉकाचो पावणी करपाची प्रक्रीया सुरू आसा. तशेंच खासगी जमिनींतल्या डम्पाची पावणी करपाकूय सरकारान मान्यताय दिल्या. खण ब्लॉकांतल्यान खनीज मालाचें उत्खनन आनी डम्प मालाचे निर्गतीक लागून खण वेवसाय व्हडा प्रमाणांत सुरू जावपाक मजत जातली. डम्पाचे पावणे खातीर शुल्कूय निश्चीत केलां.
पावणी जाल्ल्या १२ खण ब्लॉकां मदले ५ ब्लॉक सुरू जाल्यात. आदीं ३ ब्लॉकांतल्यान माल काडपाक सुरवात जाल्ली. आतां ऑक्टोबर सावन शिरगांव आनी कुडणेंच्या ब्लॉकांतल्यान माल काडपाक सुरवात जाल्या. पांचून खण ब्लॉकांतल्या वर्साक ५.३ दशलक्ष टन इतलो माल काडटले.
खनीज माल आनी डम्प मालाचे निर्यातीक लागून खण येरादारी सुरू जावन ट्रक आनी बार्जींकूय काम मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
