भांगरभूंय | प्रतिनिधी
पणजी : गोंयची खंयचीच दर्यादेग ‘नुस्तेमारी वाठार’ म्हणून अधिसुचीत करूंक ना, अशें मत्स्य खात्यान स्पश्ट केलें. परंपरीक नुस्तेमार गोंयांतल्या खुबश्या दर्यादेगांचेर नुस्तें देंवयतात. त्या दर्यादेगांचेर नुस्तें देंवोवपाची इतलीच सुवात अधिसुचीत केल्या.
परंपरीक रांपोणकार संघटणेन करंजाळे दर्यादेग ‘नुस्तेमारी वाठार’ म्हणून करूंक ना आनी आतां करची अशी मागणी केल्ली. हे विशीं म्हायती दितना मत्स्य खात्याची संचालक डॉ. शमिला मोंतेरो हांणी वयली म्हायती दिली.
प्रत्यक्षांत नुस्तेंमारी केल्ल्या वाठारांत परंपरीक नुस्तेंमारी केले उपरांत देंवपा खातीर सुरळीत जावचें, हे खातीर तितलीच सुवात अधिुचीत केल्या. राज्यांत खंयचोच वाठार ‘नुस्तेमारी वाठार’ म्हणून घोशीत करूंक नाशिल्ल्याचे संचालक मोंतेरो हांणी स्पश्ट केलें. ही दर्यादेग अतिक्रमण, ‘वॉटर स्पोर्ट्स ऑपरेटर्स’ आनी हेर उपक्रमां पसून वाटोवपा खातीर ‘नुस्तेमारी वाठार’ म्हणून अधिसुचीत करचें, अशी मागणी करंजाळेच्या रापोणकारांनी केल्ली.
हालींच हे सुवातेर आयोजीत केल्ल्या बेकायदेशीर जलतरण सर्तीक लागून ताण निर्माण जाल्लो. ह्या वेळार सर्तींत वांटेकार जाल्ले आनी नुस्तेंमार्यां मदीं वादनिर्माण जाल्लो. उपरांत हे मागणेन नेट धरिल्लो. मत्स्य खात्यानूय हे विशीं सविस्तर अहवाल मागयिल्लो. तशेंच मत्स्य खात्यान हे सर्तीक अधिकृत परवानगी दिवंक नाशिल्ल्याचें स्पश्ट केल्लें. सर्त आयोजीत केले उपरांत करंजाळे अशे तरेच्या उपक्रमांक प्रतिबंध करचो, अशी मागणी करपी जायतीं निवेदनां येतात अशेंय तांणी सांगलें. ह्यान फुडलें अशे तरेच्या उपक्रमांक परवानो दिवचे पयलीं परंपरीक नुस्तेमार्यांक विस्वासांत घेतले अशें संचालक मोंतेरो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
