भांगरभूंय | प्रतिनिधी
पणजी : बागा आनी हडफडच्या दोन आस्थापनांच्या एलईडी बोर्डार ’पाकिस्तान झिंदाबाद’ अशें बरयिल्लें पळोवपाक मेळिल्ल्यान हांगा बरोच बोवाळ निर्माण जालो. सोशल मिडियाचेर हे विशीं व्हिडियो व्हायर जाले उपरांत थळाव्यांनी बरीच तिडक उक्तायली. हे घडणुकेची म्हायती मेळटांच कळंगूट आनी हणजूण पुलिसांनी बेगोबेग कारवाय करीत सुरवातेक दोन आनी उपरांत चार जाणांक अटक केली. दोनूय एलईडी बोर्ड रोखडेच बंद केले. मंगळारा रातीं उसरां ही घडणूक सामकार आयली. उपरांत ह्या वाठारांत बरोच ताण निर्माण जालो.
नेमकें प्रकरण कितें?
पयलीं बागांतल्या ’रिवायव्ह हेअर कटिंग सलून’ ह्या आस्थापनाच्या एलईडी बोर्डार, उपरांत अशेच तरेचो हडफडच्या ’व्हिस्की पीडिया’ ह्या दुकानाच्या एलईडी बोर्डाचेरूय ’पाकिस्तान झिंदाबाद’ हो संदेश प्रदर्शीत जालो. उपरांत थळाव्यांनी हे विशीं पुलिसांक कळयलें. कळंगूटे आनी हणजूण पुलीस स्टेशनाच्या पंगडान बेगोबेग हस्तक्षेप करून ह्या आस्थापनाचें वेवस्थापन करप्यांक ताब्यांत घेतले. कळंगूटेच्यान चार जाणांक आनी हणजुणच्यान तीग जाणांक ताब्यांत घेतले. तशेंच आनीक बोवाळ जावचे पयलीं ते एलईडी बोर्ड रोखडेच बंद केले.
पुलिसांनी केली खर कारवाय
ह्या दोनूय प्रकरणांत पुलिसांनी रोखडीच एफआयआर नोंद करपाची प्रक्रिया सुरू केली. बीएनएस (भारतीय न्याय संहिता) च्या कलम १५२ आनी ६१(२) तशेंच म्हायती तंत्रज्ञान कायद्याच्या कलम ६६सी आनी ६६एफ खाला गुन्यांव दाखल करतात.
हे संदेश मुद्दम जावन प्रदर्शी केल्यात काय खंयच्या तांत्रीक हॅकिंगाक लागून अशें घडलां, हे विशीं पुलीस तपास करतात. दोशींचेर खर कारवाय करतले, अशें आस्वासन पुलीस अधिकार्यांनी दिलें. हे घडणुकेक लागून दर्यादेग वाठारांतले सुरक्षा वेवस्थेचेर आनी सायबर गुन्यांवांचेर प्रस्न निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
