भांगरभूंय | प्रतिनिधी
पणजी: पीर्ण, बार्देसचो कपील चौधरी ह्या तरणाट्याच्या खून प्रकरणांत कोलवाळ पुलिसांनी रवीश्वर नायक (गिरी), विठ्ठल तुयेंकार (कांदोळी), विनायक कांबळे (कळंगूट) आनी अॅक्विनो पेरेरा (थिवी) ह्या चौगांक अटक केली. ह्या प्रकरणांत आतां मेरेन सात जाणांक अटक केल्या.
मूळ उत्तर प्रदेशांतलो कपील चौधरी हो शुक्रारा पीर्ण आनी खरगाळी मजगतचे दोंगुल्लेर गंभीर अवस्थेंत पडिल्लो सांपडिल्लो. उपरांत 108 अॅम्बुलन्सीन ताका म्हापशेंच्या जिल्हो हॉस्पिटलांत दाखल केलो तेन्ना दोतोतरांनी ताका मरण आयिल्ल्याचें जाहीर केलें. ताचे कुडीचेर दांडो तशेंच फोपरांनी मारिल्ल्याच्या जखमांच्यो खुणो आशिल्ल्यो. मारपेट जाल्ल्यानूच ताका मरण आयिल्ल्याचो दबुाव येतकच कोलवाळ पुलिसांनी खुनाचो गुन्यांव दाखल करून तपास सुरू केलो.
ह्याच वेळार पुलिसांनी कॉल लॉकेशन आनी सीसीटीव्ही फुटेजीच्या आदाराचेर खुनाचो तपास लायलो.
शेनवारा 1 नोव्हेंबर दिसा सकाळीं रेंट अ कॅब वेवसायीक गुरुदत्त लवंदे हाका अटक केली. ताची खोलायेन चवकशी केली तेन्ना, कपील चौधरी हाणें 30 ऑक्टोबर दिसा गुरुदत्त हाचे कडल्यान रेंट अ कॅब आशिल्ली थार जीप भाड्यान घेतली. दीपक ठाकूर ह्या नांवान आशिल्लें पॅन कार्ड वळखपत्र म्हूण ताणें दिल्लें. ही जीप बांदा-सावंतवाडी हांगा पाविल्ल्याचें जीपीएस ट्रॅकरा वरवीं समजले उपरांत गुरुदत्त हाणें इश्टां सयत जीपीचो फाटलाग सुरू केलो. कुडाळ-कणकवली हांगा दुबावितांनी जीप आडायली आनी ताका थंयच मारपेट केली. उपरांत पीर्ण हांगासरले दोंगुल्लेचेर हाडून मारपेट केली. हे मारपटींत कपीलाक मरण आयिल्ल्याची म्हायती लवंदेन दिली.
मजगतीं, डायसन कुतिन्हो आनी सूरज ठाकूर ह्या दोगां दुबावितांची म्हायती पुलिसांक मेळ्ळी. शेनवारा सांजवेळा पुलिसांनी ह्या दोगांक अटक केली. उपरांत मंगळारा 4 वेर कोलवाळ पुलिसांनी रवीश्वर नायक (गिरी), विठ्ठल तुयेंकार (कांदोळी) विनायक कांबळे (कळंगूट) आनी अॅक्विनो पेरेरा (थिवी) ह्या चौगांक अटक केली. ह्या प्रकरणांत आतां मेरेन सात जाणांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
