तीन अभ्यासक्रमा खातीर प्रवेश फेरी जाहीर

भांगरभूंय | प्रतिनिधी

पणजीः गोंय तंत्रीक शिक्षण संचालनालयान बी.एस्सी नर्सींग अभ्यासक्रम, पदव्युत्तर वैजकी पदवी अभ्यासक्रम आनी अभियांत्रिकी बी.ई. पदवी अभ्यासक्रमा खातीर प्रवेश फेरी जाहीर केल्या.

संचालनायान जारी केल्ले कळोवणे प्रमाण एमबीबीएस, बीडीएस, बी.व्ही.एस.सी. आनी ए.एच, बीएएमएस, बीएचएमएस, एएचएस, बीएनव्हायएस आनी बी.एस्सी. नर्सींग ह्या अभ्यासक्रमांची प्रवेश फेरी बिरेस्तार, 13 नोव्हेंबरांक जातली. हे प्रवेश फेरयेचें सविस्तर वेळापत्रक तंत्रीक शिक्षण संचालनालयाचें वॅबसायट www.dte.goa.gov.in हाचेर अधिसुचीत केलां.

गोंय राज्यांत 2025-26 खातीर बी.एस्सी. नर्सींग अभ्यासक्रमाच्या प्रवेशा खातीर सरकारान मान्यताय दिल्या. सर्वसादारण वर्गातल्या ज्या अर्जदारांनी एनईईटी-यूजी 2025 हातूंत 71 मेरेन गूण आनी एससी, एसटी आनी ओबीसी वर्गातल्या अर्जदारांक 63 मेरेन गूण मेळ्ळ्यात, ते प्रवेशा खातीर पात्र आसतले.

ह्या संचालनालयान अधिसुचीत केल्ले एनईईटी अभ्यासक्रमांच्या गुणवत्ता वळेरेंत पी.ई. (प्रोव्हिजनल एलिजीबल) म्हणून नमूद आशिल्ले अशे अर्जदार, ता. 13 नोव्हेंबर, 2025 दिसा जावपी बी. एस्सी. नर्सींग अभ्यासक्रमाचे प्रवेश फेरयेंत वांटेकार जावपाक शकतात. प्रवेश घेवपा खातीर तांणी डीटीई वॅबसायट www.dte.goa.gov.in हाचेर अधिसुचीत केल्ल्या सविस्तर वेळापत्रका प्रमाण, तांणी तांचे वर्ग आनी गुणवत्ता वळेरेंतल्या क्रमांका प्रमाण उपस्थीत रावचे.

गोंय वैजीक म्हाविद्यालयांतली पदव्युत्तर वैजकी पदवी अभ्यासक्रमा खातीर प्रवेश प्रक्रिया आयोजीत करपा खातीर नियुक्त राज्य समुपदेशन प्राधिकरण म्हणून, तंत्रीक शिक्षण संचालनालय, पर्वरी, एनईईटी पीजी परिक्षा पास जाल्ले आनी पात्र एमबीबीएस उमेदवारां कडल्यान अर्ज मागयल्यात. अर्ज तंत्रीक शिक्षण संचालनालयाचे डीटीई वॅबसायट www.dte.goa.gov.in वयल्यान डावनलोड करून, तो भरून ताची स्वता प्रमाणीत केल्ली प्रत गरजेच्या कागदपत्रां वांगडा तंत्रीक शिक्षण संचालनालय, पर्वरी हांगा 05/11/2025 ते 10/11/2025 ह्या कालवधींत सादर करचो.

दुसरो पर्याय म्हण वयर नमूद केल्ल्या कालावधीत, अर्जदारान भरिल्ल्या अर्जाची आनी गरजेच्या कागदपत्रांच्या स्वता प्रमाणीत केल्ल्यो प्रती स्कॅन करून [email protected] हे ईमेल आयडी वयल्यान लेगीत सादर करपाक शकतात.

नेम, समुपदेशनाचें वेळापत्रक, पात्रताय, गुणवत्ता वळेरी आदीं विशीं संबंदीत सगली म्हायती डीटीईचे वॅबसायटीचेर अधिसुचीत करतले. ताका लागून सगल्या अर्जदारांनी नेमान वॅबसायट पळोवची असो सल्लो दिला.

2026-27 ह्या वर्सा खातीर गोंय राज्यांतल्या अभियांत्रिकी बी.ई. पदवी अभ्यासक्रमांचो प्रवेश हो राष्ट्रीय चांचणी संस्थे (एनटीए) वरवीं जानेवारी 2026 आनी एप्रील 2026 मजगतीं आयोजीत करपाक आशिल्ल्या संयुक्त प्रवेश परिक्षा 2026 तल्या गूण/क्रमांकाच्या आदाराचेर करतले. जेईई-मेन -2026 नोंदणी खातीर ह्या संदर्भात एनटीएन जारी केल्ल्या भौशीक सुचोवणीची प्रत https://jeemain.nta.ac.in/ ह्या संकेतथळार उपलब्ध आसा आनी डीटीई संकेतथळार www.dte. goa.gov.in चेरय अपलोड केल्या. अभियांत्रिकी बीई पदवी अभ्यासक्रमांत प्रवेश मेळोवपा खातीर सगल्या इत्सूक उमेदवारांक परिक्षा येवजण, पात्रताय, अभ्यासक्रम, ऑनलायन अर्ज प्रक्रिया आनी हेर म्हायती खातीर https://jeemain.nta.ac.in संकेतथळार अधिसुचोवणी दिल्ल्या जेईई-मेन-2026 च्या म्हायती बुलेटीनाची पुराय तपासणी करपाची सुचोवणी दिल्या.

2026-27 वर्सा गोंय राज्यांत फार्मसी, बी फार्म पदवी अभ्यासक्रमांत प्रवेश भौतिकी आनी रसायनशास्त्राच्या विशयांतल्या बेस्ट एग्रीगेट स्कोराच्या आदाराचेर, एक तर जेईई मेन 2026 वा नीट-2026 वर्सा करतले. ते प्रमाण बी फार्म अभ्यासक्रमांत प्रवेश मेळोवपा खातीर इस्तुक जेईई-मेन 2026 वा नीट-2026 वा दोनूय जाप दिवपाची निवड करूंक शकतात.