भांगरभूंय | प्रतिनिधी
पुराय वर्सभरात ३५ अपघातांची नोंद
पणजीः नोव्हेंबर म्हयनो सुरू जाता थंयसरूच आसा आनी ह्या म्हयन्यांत चार दिसां भितर रेंट अ कारींंचो आसपाव आसपी तीन अपघातांची नोंद जाल्या. हातूंत बांबोळे म्हामार्गार रेंट अ कार आनी कंटेनर ट्रका मदीं जाल्ल्या भिरांकूळ अपघातांत दोग जाणांक मरण आयिल्ल्याचे घडणुकेचो आसपाव आसा. ह्या वर्सा भितर राज्यांत रेंट अ कारींक लागून ३५ अपघातांची नोंद जाल्या, अशी आंकडेवारी येरादारी संचालनालयान जारी केल्या.
येरादारी संचालनालयाच्या वरीश्ठ अधिकार्यान दिल्ले म्हायती प्रमाण अंदूं २०२५ वर्सा जानेवारी ते नोव्हेंबर मेरेन रेंट अ कारींचो आसपाव आशिल्ले ३५ बारीक आनी गंभीर अपघात नोंद जाल्यात.
हातूंत सगल्यात चड १३ अपघात हणजूण पुलीस स्टेशनांत नोंद जाल्यात, उपरांत कळंगुट आनी साळगांव पुलीस स्टेशनांत दरेकी ५ अपघात, वेर्णा पुलीस स्टेशनांत ४, मांद्रें पुलीस स्टेशनांत ३, पोरणें गोंय आनी मुरगांव पुलीस स्टेशनांत दरेकी १ अपघात जाल्यात.
एप्रिल, मे आनी जून म्हयन्यांत रेंट अ कॅब अपघातांक सारको ओतो आयिल्लो. हातूंत सगल्यात चड अपघात जून म्हयन्यांत नोंद जाल्ले. जुलयांत अपघातांचें माळेन विसव घेतिल्लो. फकत जुलय आनी सप्टेंबर म्हयन्यांत एकूय अपघात जावंक ना. मात ऑक्टोबर म्हयन्या सावन अपघाताचे माळेक परत सुरवात जाली. जानेवारी म्हयन्यांत २, फेब्रुवारींत ४, मार्चांत १, एप्रिलांत ६, मे ७, जून ८, जुलय ०, ऑगस्ट १, संप्टेंबर ०, ओक्टोबर आनी नोव्हेंबर म्हयन्यांत दरेकी तीन अपघातांची नोंद जाल्या.
नोव्हेंबराचे सुरवेक १ ते ४ नोव्हेंबर ह्या फकत चार दिसांचे मजगती रेंट अ कारीचो आसपाव आसपी तीन अपघातांच्या घडणुकांची नोंद जाल्या. नोव्हेंबर १ वेर हणजूण वाठारांत दोन रेंट अ कारी एकामेकांक आदळून अपघात जालो. नोव्हेंबर २ तारखेर सोर्या नेटार चलोवपी पर्यटकांन आपली रेंट अ कार दुसरे गाडयेचेर वचून मोखली आनी दोग जाणांक गंभीर जखमी केले. आयज नोव्हेंबर ४ वेर फांतोडेर बांबोळे म्हामार्गार एक टँकर डीव्हाडयरावेल्यान उसळलो आनी फुडल्यान येवपी रेंट अ कारीचेर आदळलो. हांतूत दोन दिल्लींच्या पर्यटकांक धपक्याक मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
