भांगरभूंय | प्रतिनिधी
मायकल लोबो: पर्यटक सुरक्षा, कायदो सुवेवस्थेचेर मुख्यमंत्र्यां कडेन करतलों चर्चा
पणजी : पर्यटक कितलोय सोरो पियेल्लो जरी आसलो तरी हॉटेल वा क्लबाच्या कर्मचार्यांनी ताका हात लावचो न्हय. कायदो हातांत घेनासतना तांचे वागणुकेची कागाळ पुलिसां कडेन करची, अशें कळंगुटेचे आमदार मायकल लोबो हांणी म्हणलें. पर्यटकांची सुरक्षा तशेंच कायदो सुववस्था प्रस्नाचेर मुख्यमंत्री डॉ. प्रमोद सावंत हांची भेट घेवन चर्चा करतले अशें लोबो हांणी म्हणलें.
गोंय राज्य साधनसुविधा विकास महामंडळ (जीएसआयडीसी) अध्यक्षपदाचो मायकल लोबो हांणी मंगळारा ताबो घेतलो. ह्या वेळार उलयतना तांणी वयलें वक्तव्य केलें. कांय पर्यटक हॉटेल वा क्लबांनी वायट वागतात. तरी हॉटेल वा क्लबाच्या कर्मचार्यांक कायदो हातांत घेवपाचो अधिकार ना. गोंय पर्यटनस्थळ आशिल्ल्यान पर्यटकांचे सुरक्षेचा प्राधान्यान विचार करपाक जाय. हणजूण पुलीस निरीक्षकां वांगडा आमदार दिलायला लोबो आनी कळंगुटेचे आमदार ह्या नात्यान आमची बसका जाल्या. वायट वागपी पर्यटकांचेर कारवाय करपाचे आदेश मुख्यमंत्र्यांनी पुलिसांक दिवप गरजेचें. हे खातीर मुख्यमंत्र्यां वांगडा चर्चा करतले अशें मायकल लोबो हांणी म्हणलें.
सुरू आशिल्ले प्रकल्प डिसेंबर २०२६ मेरेन पुराय
गोवा साधनसुविधा विकास महामंडळा वतीन ज्या प्रकल्पांचीं कामां सुरू आसात, तीं डिसेंबर २०२६ मेरेन पुराय करतले. कामाचो दर्जो आनी उदरगतीचो आढावो हांव घेतलों, अशें मायकल लोबो हांणी अध्यक्षपदाचो ताबो घेतले उपरांत म्हणलें. मुळाव्या भलायकी केंद्रांचीं दुरुस्ती कामां आनी हॉस्पिटलाच्या कामांक प्राधान्य दितले, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
