बांबोळे टँकर आनी ‘रेंट अ कॅब’ मदीं जाल्ल्या अपघातांत दोग पर्यटक सोंपले
भांगरभूंय | प्रतिनिधी
पणजी : बांबोळे नियाझ रेस्टॉरंटा लागसारचे देंवतेर टँकर आनी ‘रेंट अ कॅब’ मदीं भिरांकूळ अपघात जालो. हातूंत दोग पर्यटक सोंपले. ऑल इंडिया सेपक टेक्रॉ असोसिएशनाचे अध्यक्ष योगेंद्र सिंग आनी सेपक टेक्रॉ खेळगडो अंकित कुमार बलियान अशीं मरण आयिल्ल्यांचीं नांवां आसात. हाका लागून खेळां मळार दुख्खाचें सांवट कोसळ्ळां. ह्या प्रकरणांत पोरणें गों पुलिसांनी टँकर चालक राहुल सरवदे हाचेर गुन्यांव नोंद करून ताका ताब्यांत घेतलो.
हे विशीं सविस्तर म्हायती अशी, टँकर ट्रक बांबोळेच्यान पणजेचे दिकेन वतालो. ‘रेंट अ कॅब’ पणजेच्यान बांबोळे येताली. हे देंवतेर चालकाचें टँकरावेल्यान नियंत्रण सुटलें आनी ताणें पयलीं डिवायडराक धपको दिलो. उपरांत ‘रेंट अ कॅबाक’ धपको दिलो. ह्या अपघातांत गाडयेचो चिड्डून चुरो जालो. डिवायडराक तेंकून आशिल्लो खांबोय कोसळ्ळो.
रातच्या सुमार देड वरांचेर हो अपघात जालो.
पोरणें गोंय पुलीस स्टेशनाचे निरीक्षक सतीश पडवळकार हांच्या मार्गदर्शना खाला हवालदार चतुर सावंत हांणी अपघाताचो पंचनामो केलो. उपरांत मरण आयिल्ल्या दोगांय पर्यटकांच्यो कुडी बांबोळेच्या गोंय वैजकी महाविद्यालय हॉस्पिटलांतल्या मोर्गांत दवरल्यो. उपनिरीक्षक जसवीता नायक हे विशीं अदीक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
