भांगरभूंय | प्रतिनिधी
कृष्ण मिरवणूक, दीपदान, त्रिपुरासूर वध, नौकानयन सुवाळ्याचें आयोजन
भांगरभूंय । प्रतिनिधी
सांखळी : विठ्ठलापूर सांखळेच्या श्री विठ्ठल रखुमाय देवळाच्या प्राकारांत तशेंच व्हाळवाट न्हंयेच्या पात्रांत दर वर्सा जावपी फामाद त्रिपुरारी पुनव आनी नौकानयन सुवाळो बुधवारा 5 नोव्हेंबराक मनयतले. ह्या सुवाळ्याची सगली तयारी सरकारा वतीन विठ्ठलापूरची दीपावली उत्सव समिती आनी श्री विठ्ठल पंचायतन संस्थांच्या आदारान चालू आसा. ह्या त्रिपुरारी पुनव उत्सवा निमतान सकाळच्यान विवीध कार्यावळींक सुरवात जातली. राती वेळार श्रीदेव विठ्ठल रखुमायेची पालखी व्हाळवाट न्हंयेदेगेर आयले उपरांत आकर्शक व्हडीं न्हंयेच्या पात्रांत सोडटले, अशी म्हायती दीपावली उत्सव समिती वतीन घेतिल्ले पत्रकार परिशदेंत दिली.
त्रिपुरारी पुनवेचे आदले सांजेर म्हणल्यार मंगळारा 4 नोंव्हेंबराक श्री विठ्ठल मंदिरांत कला किर्तनाचें आयोजन केलां. बुधवारा 5 नोव्हेंबराक राज्य सरकाराचें कला आनी संस्कृती संचालनालय, गोंय म्हायती प्रसिद्धी खातें, गोंय पर्यटन खातें, गोंय पर्यटन उदरगत म्हामंडळ, श्री विठ्ठल पंचायत संस्थान आनी दीपावली उत्सव समिती विठ्ठलापूर सांखळी हांच्या जोडपालवान त्रिपुरारी पुनव उत्सव आनी नौकानयन सुवाळो जातलो.
सकाळीं 10 वरांचेर श्रीकृष्ण पुजन जातलें. सांजेच्य 5 वरांचेर श्रीकृष्णाची रथांतल्यान वाद्यवृंद आनी दिंडी सयत मिरवणूक काडून विठ्ठलापूर वाठारांत भोंवडायतले. 7 वरांचेर श्रीकृष्णाची मिरवणूक व्हाळवाट न्हंयेदेगेर आयले उपरांत सवायशिणी बायलां वतीन व्हाळवाट न्हंयेंत पणट्यो सोडून दीपदान सुवाळो जातलो. 7.30 वरांचेर विठ्ळ रखुमाय देवळाच्या प्राकारांत ‘आधी देवा पांडुरंगा’ ही सुगम संगिताची कार्यावळ जातली. रातच्या 10.30 वरांचेर श्री विठ्ठलाची पालखी मिरवणुके सयत देवळांतल्यान भायर काडटले. 11 वरांचेर मानेस्तांच्या हस्तुकीं नौकानयन सुवाळ्याक सुरवात जातली. 11.15 वरांचेर व्हाळवाट न्हंयेच्या पात्रांत उबारिल्ले माचयेर दशावतारी नाट्य मंडळ प्रस्तूत ‘त्रिपुरासूर वध’ हो दशावतार नाटकांतलो एक भाग सादर करतले. ह्या नाटकांत त्रिपुपासूराचो वध जाताच न्हंयेच्या पात्रांत उबारिल्ल्या त्रिपुरासूराचे प्रतिमेचो वध जावन फोग लायतले, तशेंच ह्या सुवाळ्याचें आनीक एऐक आकर्शक आशिल्ले सरंगें मळबांत सोडटले. 11.30 वरांचेर व्हाळवाट न्हंयेंत सोडिल्ले बोटींचे पांवड्या पांवड्यान परिक्षण जातलें.
ह्या सुवाळ्याक मुख्यमंत्री डॉ. प्रमोद सावंत, विठ्ठल देवस्थानचे अध्यक्ष प्रतापसिंह राणे, पर्यटन मंत्री रोहन खंवटे, कला आनी संस्कृती मंत्री रमेश तवडकार, गोंय पर्यटन उदरगत म्हामंडळाचे अध्यक्ष केदार नायक, मयेंचे आमदार प्रेमेंद्र शेट, पर्येंची आमदार देविया राणे, सांखळीची नगराध्यक्षा सिद्धी प्रभू, कारापूर सर्वणचे सरपंच लक्ष्मण गुरव आनी हेर मानेस्त उपस्थीत रावतले.
नौकानयन सर्तींतल्या जैतवंतांक पयलें 40 हजार रुपया, घोळटो करंडक आनी प्रशस्तीपत्र, दुसरें 35 हजार रुपया घोळटो करंडक आनी प्रशस्तीपत्र, तिसरें 30 हजार रुपया, घोळटो करंडक आनी प्रशस्तीपत्र, चवथें 25 हजार रुपया आनी प्रशस्तीपत्र, पांचवें 20 हजार रुपया आनी प्रशस्तीपत्र, ते भायर पांच स्पर्धकांक 15 हजार रुपयांचीं उमेद वाडोवपी इनामां आनी प्रशस्तीपत्र दितलें. तेच प्रमाण परिक्षकांनी वेंचिल्ल्या विशेश 10 स्पर्धक व्हड्यांक 8 हजार रुपया आनी प्रशस्तीपत्र जाल्यार उरिल्ल्यांक परिक्षकां वतीन पात्र वांट घेतिल्ल्या स्पर्धकांक 5 हजार रुपया आनी प्रशस्तीपत्र दितले, अशी म्हायती पत्रकार परिशदेंत दिली. पत्रकार परिशदेक दीपावली उत्सव समितीचे अध्यक्ष नरेंद्र जोगळे, सचीव समीर देसाय, भांडारी अविनाश नायक, उपाध्यक्ष दिनेश उसपकार, उपसचीव जितेंद्र नायक, उपभांडारी सोमनाथ मोरजकार, पंच वांगडी ज्ञानेश्वर बाले आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
