मडगांव नगरपालिकेंतल्या दिसवड्यावेल्या कामगारांचें काम बंद आंदोलन

भांगरभूंय | प्रतिनिधी

कामाचो योग्य मोबदलो बेगोबेग दिवपाची केली मागणी

मडगांव: मडगांव नगरपालिकेंतल्या दिसवड्यावेल्या कामगारांचें कंत्राट आयतारा, २ नोव्हेंबराक सोंपलें. मात ताचें आजूनय नुतनीकरण करूंक ना. हाका लागून तिडकल्ल्या दिसवड्यावेल्या कामगारांनी सोमारा कामाचेर येवपाक स्पश्टपणान न्हयकार दिवन काम बंद आंदोलन सुरू केलां. कंत्राट नुतनीकरणाचो आदेश तशेंच केल्ल्या कामाचो योग्य मोबदलो बेगोबेग दिवचो, अशी तांची मागणी आसा.
आदली नगराध्यक्ष साविओ कुतिन्हो हांणी ह्या दिसवड्यावेल्या कामगारांक फाटबळ दिला. भीमशक्ती संघटणे वतीन तांकां गरजेचें सहकार्य करतले, अशी गवाय दिली. कुतिन्हो हांणी ह्या वेळार पालिकेच्या कामाचेर गंभीर प्रस्न हाजीर केले. दिसवड्यावेल्या कामगारांक तात्पुरतो दर्जो दिवपाचे आशिल्ल्याचें आस्वासन दिल्लें, मात ताच्यो फॉर्माचेर सयो घेवनूय तें आस्वासन पुराय जावंक ना. आतां सुपरवायझर तांकां काम सुरू करपाक सांगतात आनी आदेश एक ते दोन महिन्यांनी मेळटले अशें सांगतात. हाचे मजगतीं तांकां कितेंय अपघात जाल्यार ताची जापसालदारकी कोण घेतलो, असो प्रस्न कुतिन्हो हांणी केलो.
तशेंच, १५ ते २० वर्सां रोजंदारीचेर काम केल्ल्यांक तात्पुरतो दर्जा दिवपाचें आस्वासनूय पाळिनात. ह्यान पयलीं १४ कामगारांक कायम करपाचो आदेश काडून तो फाटीं घेतिल्लो, तशेंच न्यायालयाच्या आदेशा उपरांतूय कायमस्वरूपी करपाचो आदेश तीन म्हयने पुराय जावनूय जारी करूंक ना, अशी टिका तांणी केली. ऑक्टोबरांत सुटयेच्या दिसांनी काम करूनय तांकां फकत २६ दिसांचो दितात अशेंय तांणी स्पश्ट केलें.
मजगतीं, मडगांवचे नगराध्यक्ष दामोदर शिरोडकार हांणी कामगारांक बेगोबेग कामाचेर रुजू जावपाचो म्हूण उलो मारला. पालिकेची तशेंच सरकाराची कामाची प्रक्रिया सुरू आसता आनी आदेश येवपा खातीर दीस फाटीं-फुडें जावपाक शकतात. दिसवड्याच्या कर्मचार्‍यां विशींच्या खर्चाक मंजुरी मेळून आदेश तयार आसात. तांकां ब्रेक दिवपाचो कसलोच प्रकार जावचो ना आनी तांकां तात्पुरतो दर्जो दितले अशेंय तांणी सांगलें.

शिरोडकार हांणी सांगलें, ’कामगारांक कोणें तरी भडकयले जरी आसलें तरी जे कामगार कामार येवचे ना, तांचें चुरचुरे करचे ना आनी तांकां भडकावप्यांकूय सोडचे ना. हो सगलो प्रकार नोंद करून दवरतले, अशी शिटकावणी तांणी दिली.