भांगरभूंय | प्रतिनिधी
पणजी : ‘गोंय रॅबीज निर्मूलन मॉडेल’ सध्या देशभर आनी विदेशांतूय चर्चेंत आसा. गोंयांत ह्या मॉडेलाक बरेंच येस मेळ्ळे उपरांत देशांतलीं १२ राज्यां आनी २० देशांनी ह्या मॉडेलाचेर काम करपाक सुरवात केल्या.
सप्टेंबर २०१७ सावन राज्य सरकार आनी मिशन रॅबीज संस्थेन गोंयांत रेबीज निर्मुलनाचें काम हातांत घेतलें. व्यापक कार्यावळ राबयत मनशाचें रॅबीजांतल्यान मरण सोंपोवपाचेर भर दिल्या. हातूंत येस मेळयलें आनी तें तिगोवन दवरलां. एक म्हत्वाची कामगिरी म्हणून हाचे कडेन पळयतात, विज्ञानीक जर्नल्सांत हे विशीं म्हायती प्रसिद्ध जाल्या. रॅबीजच्या इतिहासांत पयलेच फावट ताचेर येसस्वीपणान नियंत्रण हाडून रॅबीज गोंयच्या सोंपोवप शक्य जालां. उपरांत हेर राज्यां आनी देशांत हो मॉडेल राबयतात, अशी म्हायती मिशन रॅबीजचे डॉ. अप्पुपिल्लई हांणी दिली.
गोवा मॉडेल आतां देशांतले ३६ जिल्ले आनी १२ राज्यांनी चालीक लायलां. थळाव्या राज्य सरकारांचे मजतीन ही मोहीम राबयतात. २० देशांनीय गोवा मॉडेल स्विकारला. हे विशींच्या येसाची म्हायती ‘इंटरनल जर्नल्स’त प्रस्द्धि केल्या. आनी संवसारीक भलायकी संघटना, संवसारीक जनावरां भलायकी संघटना सांबाळटा.
अंदूं जानेवारी म्हयन्यांत खंयच रॅबीजचीं लक्षणां दिसूंक ना. मनीस आनी जनावरां मदींय दिसूंक ना, अशें डॉ. अप्पुपिल्लाई हांणी स्पश्ट केलें. गोंयांत रॅबीज निर्मूलनाक येस मेळचे पयलीं ताच्या मनीस आनी जनावरांच्या संसर्ग घडणुकांच्या चक्राक लागून रेबीज सोंपोवप अशक्य अशें दिसतालें. कितल्याशाच वर्सां सावन लस उपलब्ध जरी आसा तरी, ताचे कडेन आडनदर जाताली.
संवसारीक भलायकी संघटणा २०३० मेरेन रॅबीजाक लागून जावपी मरणां शुन्याचेर हाडपाचें ध्येय आसा. गोंयच्या मॉडेलांतल्यान हें आव्हान स्विकारलां. १३ भारतीय राज्यांनी मॉडेल सुरू आसा. केरळ आनी मुंबयक रॅबीज हाताळप कठीण दिसतालें. मात, आतां आशेचें किरण निर्माण जाल्ल्याचें तांणी स्पश्ट केलें.
रस्ताद सुण्यांचें लसीकरण करून वाड नियंत्रणांत हाडप. २४ वरां नदर दवरप, आपत्कालीन हॉटलायन आनी रोखडोच प्रतिसाद पंगडा वरवीं कार्यरत रावप. सुण्यांनी घांस मारचो न्हय म्हूण भुरग्यां मदीं जागृती मोहीम राबोवप. लसीकरण यत्नांचो आढावो घेवपाक स्मार्टफोन ऍप वापरप.
राष्ट्रीय रॅबीज नियंत्रण कार्यावळीचो (एनआरसीपी) भाग म्हणून गोंयच्या येसा पसून शिकपा खातीर आनी समान धोरणां चालीक लावपाक हेर राज्यां आनी देशांक उर्बा दितात. २०३० मेरेन भारतांतल्यान रेबीज निर्मूलना खातीव राष्ट्रीय कृती आराखडो थारायला आनी तातूंत गोंयच्या मॉडेलाचो आसपाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
