भांगरभूंय | प्रतिनिधी
मुंबय, खबरां संस्था : भारतीय महिला क्रिकेट संघान इतिहास रचलो. तांणी दक्षीण आफ्रिकेक ५२ धावड्यांनी हारोवन बायलांचें वन डे वर्ल्ड कप जिखलें. नवी मुंबयच्या डी वाय पाटील स्टेडियमाचेर आयतारा रातीं खेळिल्ल्या निमाण्या सामन्यांत, टीम इंडियान पयलेच फावट संवसारारीक जैत मेळोवन इतिहासांत आपलें नांव कोंरांतलें. बायलां क्रिकेटी खातीर हो एक व्हड खीण जावन आसा, कारण तांणी पयलेच फावट आयसीसी सर्त जिखल्या. ह्या जैता उपरांत, भारतीय क्रिकेट नियामक मंडळान (बीसीसीआय) पुराय संघा खातीर इनामां जाहीर केल्यांत.
बीसीसीआयचे सचीव देवजित सैकिया हांणी पंगडा खातीर ५१ कोटी रुपयांची व्हड इनामाची रक्कम जाहीर केल्या. ही रक्कम आंतरराष्ट्रीय क्रिकेट परिशदे कडल्यान (आयसीसी) मेळिल्ले इनामाचे रकमेचो एक म्हत्वाचो बोनस आसा. सर्तींतल्या जैतिवंतांक पयलींच ४.४८ मिलियन अमेरिकन डॉलर्स (सुमार रु. ४० कोटी) इनामाची रक्कम मेळ्ळ्या.
भारतीय बायलां पंगडाची कॅप्टन हरमनप्रीत कौर हांचो कपिल देव, एमएस धोनी, रोहित शर्मा ह्या व्हड कर्णधारांच्या पंगडांत आसपाव जाला. दक्षीण आफ्रिका बायलां आड जाल्ल्या बायलांच्या वन डे वर्ल्ड कप फायनलींत तिणें आपल्या पंगडाक इतिहासीक जैत मेळोवन दिलें. ह्या येसाक लागून बायलांच्या क्रिकेटीक आनीक उर्बा मेळटली आनी देशांत हो खेळ चड लोकप्रिय जातलो, अशी आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
