भांगरभूंय | प्रतिनिधी
लुकसाण भरपाये खातीर अर्जांचो ओतो सुरू
पणजीः आयतारा पावसान विसव घेतिल्लो आसलो तरी शेनवार मेरेनच्या पावसान शेतांचें व्हड लुकसाण केलां. पुराय गोंयांत शेतांच्या लुकसाणीचें प्रमाण 2 हजार हॅक्टरा वयर वचपाचो मुळावो अदमास आसा. लुकसाण भरपाये खातीर शेतकारां कडल्यान विभागी कार्यालयांनी व्हड प्रमाणांत अर्ज येवपाक सुरवात जाल्या. अधिकाऱ्यां कडल्यान लुकसाणेची पळोवणी सुरू आसा. पळोवणी जाले उपरांत निश्चीत लुकसाणेचो आंकडो कळप शक्य जातलें अशें तांणी सांगलें.
फक्त मेणकुरें आनी साळ वाठारांत 380 हॅक्टर शेतांचें लुकसाण जालां. पेडणें म्हालात 200 हॅक्टरा परस चड शेतांचें लुकसाण जालां. काणकोण, सांगें, साश्ट, धारबांदोडें, बार्देस, फोंडें ह्या सगल्या म्हालांनी शेतांचें लुकसाण जालां. लुकसाणेचो आंकडो सहज 2 हजार हॅक्टरा परस चड जातलो अशी म्हायती शेतकारां कडल्यान मेळ्ळी. हॅक्टरी 40 हजार प्रमाण लुकसाण भरपाय दिवपाची घोशणा शेतकारांनी केल्या. शेतकार मात हे रकमेचेर खोशी नात. लुकसाण भरपाय वाडोवन दिवपाची मागणी आसा.
हॅक्टरी 40 हजार प्रमाण आनी चडांत चड 4 हॅक्टर मेरेन लुकसाण भरपाय दिवपाची तजवीज आसा. हाका लागून एका शेतकाराक चडांत चड 1 लाख 60 हजार रुपया मेरेन लुकसाण भरपाय मेळप शक्य आसा. लुकसाण भरपायेची रक्कम वाडोवची, अशी मागणी हांव मुख्यमंत्री डॉ. प्रमोद सावंत हांचे कडेन करतलों अशें दिवचलचे आमदार डॉ. चंद्रकांत शेटये हांणी सांगलें. ही रक्कम सामकी उणीं आसा. मजुरीक लागून शेतां करप आतां परवड ना. तरी लेगीत ही रक्कम शेतकारांक आदार दिवपा खातीर आसा. पुराय लुकसाण भरपाय दिवप सरकाराक शक्य ना, अशें तांणी सांगलें.
कुडटरीचे आमदार अालेक्स रेजिनाल्ड हांणी लेगीत हॅक्टरी 40 हजारां परस चड लुकसाण भरपाय दिवपाची मागणी केल्या.
दिवचल विभागी कार्यालयांत 690 परस चड शेतकारांचे अर्ज आयल्यात. सगल्या कार्यालयांनी अर्ज येत आसात. हाका लागून शेत रोवपी लागीं लागीं सगल्या शेतकारांचें कांय प्रमाणांत लुकसाण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
