इत्सुकांची तयारी नेटान सुरू

भांगरभूंय | प्रतिनिधी

फोंडें पोटवेंचणूकः भेट घेवपा सयत मतदारां कडेन संपर्क सादपाक सुरवात

राजकी पक्षांचो मात अजून निर्णय ना

पणजी: फोंडें पोटवेंचणुकेची तारीख अजून मेरेन जाहीर जावंक नासली तरी इत्सुकांनी वेंचणुकेची तयारी सुरू केल्या. बसका घेवन उमेदवार तशेंच हेर गजालींचेर निर्णय घेवपाचे राजकी पक्षांच्या अध्यक्षांनी सांगिल्लें आसलें तरी इत्सुकांनी मात भेटी घेवपा सयत तयारेक सुरवात केल्या.

शेतकी मंत्री तशेंच फोंडेचे आमदार रवी नायक हांकां 14 ऑक्टोबराक रातीं कडेन मरण आयलें. हाका लागून फोंडें मतदारसंघा खातीर 6 म्हयन्यां भितर पोटवेंचणूक जातली. फोंडें पोटवेंचणुके पयलीं फुडल्या म्हयन्यांत 13 डिसेंबराक जिल्हो पंचायत वेंचणूक जातली. जिल्हो पंचायत वेंचणुके उपरांत फोंडें पोटवेंचणुकेचो धोल वाजतलो. फोंडें पोटवेंचणुके खातीर योग्य वेळार पक्ष उमेदवार जाहीर करतलो अशें मुख्यमंत्री डॉ. प्रमोद सावंत हांणी जाहीर केलां.

फोंडें पोटवेंचणुकेचो उमेदवार जाहीर करपाक अजून वेळ आसा. बसका घेवन पक्ष उमेदवार निवडीची प्रक्रिया निश्चीत करतलो. युती विशीं हेर पक्षां कडेन चर्चा जातली, अशें प्रदेश काँग्रेस अध्यक्ष अमीत पाटकार हांणी स्पश्ट केलां.

राजकी पक्षांनी उमेदवार वा युती विशीं कसलोच निर्णय घेवंक नासलो तरी सगल्या पक्षांच्या इत्सुकांनी मात मतदारां कडेन संपर्क सादपाक सुरवात केल्या. रवी नायक हांच्या मरणा उपरांत महाराष्ट्रवादी गोमंतक पक्षान रितेश नायक हांकां तेंको जाहीर केलो. भाजपान रितेश नायक हांकां उमेदवारी दिल्यार बिनशर्त तेंको दिवपाची घोशणा मगोचे अध्यक्ष दीपक ढवळीकार हांणी केल्या. भारतीय जनता पक्षान मात रितेशाक उमेदवारी दिवपा विशीं कसलेच संकेत वा घोशणा करूंक ना. मगोची भाजपा कडेन युती आसा. हाका लागून मगो भाजप उमेदवाराक तेंको दितलो, अशें मगोचे फुडारी आनी मंत्री सुदिन ढवळीकार हांणी लेगीत सांगलां.

अशें आसून लेगीत खंयच्याय स्थितींत वेंचणूक लडोवपाची घोशणा मगोचे डॉ. केतन भाटीकार हांणी केल्या. मतदारां कडेन संपर्क सादपाक हांवें सुरवात केल्या. वेंचणूक जाहीर जावचे पयली दोन तरी फेरयो पुराय जातल्यो, अशें डॉ. केतन भाटीकार हांणी सांगलें. मगोन उमेदवारी दिली ना जाल्यार अपक्ष म्हूण वेंचणूक लडोवपाची म्हजी तयारी आसा, अशेंय भाटीकार हांणी सांगलें.

फाटले खेपे काँग्रेस पक्षान राजेश वेरेंकार हांकां उमेदवारी दिल्ली. पोटवेंचणुकेंत ते काँग्रेस पक्षाच्या उमेदवारी खातीर इत्सूक आसात. हांवें कार्यकर्त्यां कडेन संपर्क सादपा सयत तयारी सुरू केल्या. पोटवेंचणुकेची तारीख केन्नाय जाहीर जाली तरी ताचे पयलीं तयारी सुरू करप योग्य थारता अशें तांणी सांगलें.

विश्वनाथ दळवी हे भाजप उमेदवारी खातीर इत्सूक आसात. पक्षा खातीर बरींच वर्सां हांव वावर करतां. हाका लागून उमेदवारीचेर म्हजो दावो आसतलो. म्हजे तरेन पोंटवेंचणुकेची तयारी सुरू आसा अशें विश्वनाथ दळवी हांणी सांगलें.

सर्गेस्त रवी नायक हांचे पूत रितेश नायक हांकां भाजपाची उमेदवारी मेळटली, असो अदमास आसा. हांव भारतीय जनता पक्षाचो कार्यकर्तो आसा. म्हजो वावर सेगीत सुरू आसा. मात पक्षान आदेश दिले बगर वेंचणुके विशीं हांव अधिकृतपणान वावर करूंक शकना, अशें रितेश नायक हांणी सांगलें.