भांगरभूंय | प्रतिनिधी
संबंदीत खात्यान धनया आड कारवाय करपाची मागणी
वास्को: म्हामार्गार भोंवपी म्हशींक लागून वाहन चालकांक व्हड प्रमाणांत त्रास सोंसचे पडटात. ह्यो म्हशी अचकीत रस्तो हुपतात तेन्ना अपघात जावपाची शक्यताय आसा. ह्या प्रकरणांत येरादारी खात्याचे अधिकारी, पुलीस, येरादारी पुलीस विभागांनी संबंदीत म्हशींच्या धनयाचो सोद घेवन कारवाय करपाची गरज आसा.
दाबोळे विमानतळा सामका वेल्या म्हामार्गार दुभाजकां मदीं लायिल्ले तण तशेंच हेर सोबेचीं झाडां खावपा खातीर ह्यो म्हशीं येतात. थंयचे तण खाता आसतना त्यो रस्त्यार आनी दुभाजका मदीं उब्यो आशिल्ल्यो नदरेक पडटात. त्या म्हशींचो गोठो लागसारूच आसूंक जाय. ताका लागून धनी त्या म्हशींक म्हामार्गार सोडटात.
शेनवारा सकाळीं ह्या म्हशींक लागून वाहनचालकांक मोटो त्रास सोंसचो पडलो. म्हामार्गार गतीन येरादारी सुरू आसता. ताका लागून अचकीत रस्त्यार हेवटेन तेवटेन धांवपी म्हशींक लागून अपघात जावपाची चड शक्यताय आसा.
मजगतीं चिखली हांगासरल्या एका गोठ्यांतल्यो म्हशी सकाळच्या वेळार रस्त्यार सोडटात. म्हशी एके लायनींत चलत आसतात तेन्ना त्यो पुराय रस्तो आडायतात. ताका लागून येरादारीची कोंयडी जाता. वाहनचालकांकूय मनस्ताप सोंसचो पडटा.
ह्या म्हशींक रस्त्यार सोडून वाहनचालकांच्या जिवाक घात निर्माण करपी म्हशींच्या धनया आड कारवाय करपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
