भांगरभूंय | प्रतिनिधी
जैतीर- उगव्यां रेंव उसपुपाच्या वादांत पांच थळाव्या तरणाट्यांक धरल्यात. तातूंत आयआरबीचे दोन पुलीस आसात. ही धपको दिवपी गजाल. पोरसांतलें पीक कोणें खांवचें न्हय, म्हूण वंय घालतात. पूण हांगा वंयूच पीक खाता अशें दिसून आयलां. कायदो, सुवेवस्थेचेर प्रस्नचिन्न लावपी ही घडणूक. फाटीं कोलवाळे बंदखणींत खुद्द पुलीसूच कैद्यांक घुंवळे वखदां हाडून दितना सांपडिल्लो. उगव्यां पांच जाणां मदल्या नेमक्यो कोणे गुळयो घाल्यो, तें उक्तडार येतलेंच. दोशींचेर कडक कारवाय जाय. सरकारी नोकरेंत आसल्यार फक्त सादें निलंबन उपकारचें ना.
मेळिल्ल्या खबरां प्रमाण, हो सगलो वाद रेंव काडपी दोन गटां मदल्या सर्तीक लागून जाला. रेंव उसपुपाक बंधनां आसात. फार मारपी वा जखमी जाल्ल्यां कडेन रेंव काडपाचे परवाने आशिल्ले? ते मध्यानरातीं रेंव काडपाक कित्याक गेल्ले? सध्या जे पद्दतीन तपास चल्ला, तें पळयल्यार पुलिसांनी हें प्रकरण गंभीरपणान घेतलांशें दिसता. कारण विरोधी फुडारी, लोकांनी पुलिसांचेर, सरकाराचेर खर टिका सुरू केल्या. दुबावितांची आडनांवां पळयल्यार ते एकाच घराब्यांतले कशे दिसतात. तीग जाणांनी तर पिरायेची पंचविशीय हुपूंक ना. रेंव व्हरपाच्या संघर्शांतल्यान हो हल्लो जाला आसतलो. दुसऱ्या गटाचीय चवकशी जावंक जाय. पिस्तुलां, सुरे, तरसादी, दांडे घेवन भोंवपाचेर बंदी जाय.
गोंयांत फाटल्या कांय दिसांनी गुन्यांवकारी घडणुको वाडल्यात. हातूंत तरणाटे चड आसात. मना आड कितेंय जालें काय मारपेट करप, फार मारप, दांडे, बेल्टांनी बडोवप…..! सध्याचो तरणाटो इतलो अस्वस्थ कित्याक जाला, ताचे फाटलीं कारणां सोदून काडपाचो वेळ आयला. मात्शें कितें जालें काय तरणाटे फुर्योज जातात. म्हारगाय, वशिलेबाजी, भ्रश्टाचार, गैरकारभार, सगल्या मळां वयली जिवघेणी सर्त… जायतीं कारणां आसतलीं. अस्वस्थ तरणाटे पिळगेच्या भितर कितें तरी खदखदता. तें व्यक्त करपाक थोडे भियेतात, मागीर तांची तिडक ज्वालामुखी सारकी अचकीत भायर सरता. ती चड करून गुन्यांवकारी पद्दतीचीच आसता. तिडकी सरशीं जालें तरी तें चुकीचें. पेडण्यां मध्यानरातीं जालें ती चोंब्याची प्रतिक्रिया. मनीस टोळी करून मुखार सरल्यार ताचें सोंश्याचें काळीज पसून वागाचें जाता. फार पेटयल्यार कितें जातलें हें सगल्यांकूच खबर आसता. म्हणटकच जाणून बुजून तांणी हें केलां आसतलें. आपले विचार पटनात, वैयक्तीक राग, समाजांतल्या कांय घटकांची तिडक अशें सगल्यांचें खतखतें जालें काय मनशाक आपूण कितें करता तेंच कळना जाता. एका तरणाट्याक बडोवपाची घडणूक हालींच घडली. तातूंतय एक पुलिसाक निलंबीत केला. केदोय व्हडलो विरोधक आसलो तरी ताका गंभीर जखमी करप, जिवेशीं मारप हें चुकीचेंच. पूण हें जायत आयलां आनी तातूंत पुलिसूच सामील आशिल्ल्याचें दिसतकच कितें म्हणपाचें तेंच कळना जाता.
गोंयांत बऱ्याच जाणांच्या हातांत आलायतो पयसो खुळखुळपाक लागला. ताकाच लागून कांय तरणाटे वेसनाचे धुंदींत मस्ती करीनात मूं? जमनी, भाटां विकप वाडलां. त्या दुडवांच्या जिवार कोण कायदो मोडपाचें धाडस करीना मूं? काय समाजीक स्थिती, सरकारी यंत्रणे आड मन खदखदता? थोडे तरणाटे चुकीच्या जाग्यार चुकीच्यो गजाली करतात? आयज गोंयच्या समाजीक मळाचेर (जमनी बी विकप… आनी खूब कितें) जें कितें चल्लां, तें पळयल्यार गोंय फुडल्या पिळग्यां खातीर सांबाळून दवरपाची गरज आसा. साठी हुपिल्ले जाण्टे फक्त मार्ग दाखोवंक शकतात. कारण मतपेटी तांच्या हातांत ना. येता ते वेंचणुकेत राज्यांतलीं 55 टक्के मतां 18 ते 36 वर्सां पिरायेच्या तरणाट्यांचीं आसतलीं, अशें सरकारी आंकडे सांगतात. म्हणटकच गोंयमायेक आदले गिरेस्तकायेन नटोवपाची जबाबदारी तरणाट्यांची. जाण्टेले फक्त मार्गदर्शन करपाक शकतात. न्हय तांणी तें करपाकूच जाय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
