भांगरभूंय | प्रतिनिधी
बिगरमोसमी पावसाचें प्रमाण १५९.३ टक्के चड
पणजी : शेतांचें व्हडा प्रमाणांत लुकसाण केले उपरांत आयतारा पावसान विसव घेतलो. आयतारा दनपरां वत पडलें. हाका लागून व्हडली दिवाळी (तुळशीचें लग्न) आडखळ नासतना मनोप शक्य जातलें. इतले मजगतीं बिगरमोसमी (१ ऑक्टोबर उपरांत) पावसाचें प्रमाण १५९.३ टक्के चड आसा.
आता मेरेन राज्यांत १ ऑक्टोबर उपरांत बिगरमोसमी पावसाचें प्रमाण १७.११ इंच (४३४.८ मीमी) आसा. पेडणें, पोरणें गोंय, धारबांदोड्यां, सांखळे, मुरगांवां वट्ट २० इंचा परस बिगरमोसमी पावसाची नोंद जाल्या.
ऑक्टोबराचे सुरवेक पावसाचें प्रमाण उणें आशिल्लें. मात दिवाळे पयलीं पावसाचें प्रमाण वाडलें. नरकासूर भिजोवपा सयत पावसान शेतां लेगीत आडवीं उडयलीं. दिवाळे उपरांत पावसाचो नेट देंवलो. मात बुधवार, बिरेस्तार आनी शुक्रार सेगीत पावस पडलो. हाका लागून शेतांचें लुकसाण वाडलें. आयतारा पावसान विसव घेतलो. अंदूं एकादस शेनवार आनी आयतार अशी दोन दीस आशिल्ल्यान तुळशीचीं लग्नां दोन दीस म्हणल्यार आयतार आनी सोमारा अशे दोन दीस जातलीं. थोडे त्रिपुरारी पुनवे मेरेन लग्नां करतात. आयतारा दनपार मेरेन पावस नाशिल्लो. हाका लागून आयज जावपी तुळशीच्या लग्नाक पावसाची आडखळ आसची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
