भांगरभूंय | प्रतिनिधी
नवी दिल्ली, खबरां संस्था: मोंथा चक्री वादळाचो प्रभाव सध्या सोंपला. ताचे वाटेर आशिल्ल्या राज्यांनी आतां पावस पडचो ना. पूण राजस्थान, मध्य प्रदेश, पंजाब आनी हिमाचल प्रदेशांत पावस पडपाची शक्यताय आसा. आयएमडीच्या म्हणण्या प्रमाण फुडल्या ३-४ दिसांत दोंगराळ राज्यांनी आनी मैदानी भागांत तापमान देंवतलें, जाका लागून थंडी वाडटली.
हिमाचलांत ४ आनी ५ नोव्हेंबराक बर्फ पडपाची शक्यताय आसा. ३ नोव्हेंबराचे रातीं अस्तंतेकडलो विक्षोभ सक्रिय जातलो. सद्या कुकुमसेरीचें तापमान उण्यात उणें १.२ डिग्री सेल्सियस आनी ताबोंत तें उण्यांत उणें ०.८ डिग्री सेल्सियस आसा.
अरबी दर्यांत तयार जाल्ली उण्या दाबाची प्रणाली शेनवारा दुबळी जाली. हाका लागून पावस थारलो. ३ नोव्हेंबराक पावस परतून सुरू जातलो. जायपूर, अजमेर, भरतपूर, कोटा, उदयपूर आनी जोधपूर भागांत ३ आनी ४ नोव्हेंबराक हवामानांतल्या बदला खातीर अस्तंतेकडलो विक्षोभ सक्रीय जातलो. ३ नोव्हेंबराक १७ जिल्ह्यां खातीर पावसाचो येलो अलर्ट जारी केला.
अरबी दर्या आनी बंगालच्या खाडींत दोन उण्या दाबाची प्रणाली सक्रीय आसा, मात तांचो राज्याचेर उणोच परिणाम जातलो. फुडले तीन दीस इंदौर, भोपाळ, उज्जैन, जबलपूर आनी नर्मदापुरम विभागांतल्या जिल्ह्यांनी येलो अलर्ट दिला. आयतारा इंदौर, नर्मदापुरम आनी जबलपूर विभागांतल्या १० जिल्ह्यां खातीर पावसाची शिटकावणी दिल्या. मजगतीं, भोपाळ, ग्वालियर आनी उज्जैन हांगा वातावरण बरें आसतलें.
पंजाबांत रातचें तापमान १.६ अंश उणें जालां. ४ नोव्हेंबराक अस्तंतेक नवो विक्षोभ सक्रिय जावपाची शक्यताय आसा, जाका लागून दोंगराळ वाठारांत बर्फ पडपाची आनी पावस पडपाची शक्यताय आसा. हाचो परिणाम अस्तंतेकडल्या पंजाबाचेरूय जातलो आनी हिमाचल प्रदेशाचे शिमेवयल्या जिल्ह्यांनी पावस पडूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
