भांगरभूंय | प्रतिनिधी
राष्ट्रीय महामार्ग प्राधिकरण अपघात आडायतलें
नवी दिल्ली, खबरां संस्था: राष्ट्रीय म्हामार्गांचेर रस्त्यार जावपी अपघात आडावपाक आतां कंत्राटदारांक जापसालदार आसतले. ब्लॅक स्पॉट (जंय चड करून अपघात जातात) ना करपा खातीर हें पावल उबारलां. भारतीय राष्ट्रीय म्हामार्ग प्राधिकरणान हो निर्णय घेतला. बेगीनूच अधिसुचोवणी जारी जातली.
नवे वेवस्थे प्रमाण, रस्त्याच्या ज्या भागाचीो सांबाळ जो कंत्राटदार करता थंय अपघात जावपाचे थारावपाची जापसालदारकीय ताचीच आसतली. एकाच सुवातेर अपघात जालो जाल्यार त्याच सुवातेर दुसरो अपघात ५०० मीटर अंतरा मेरेन जावचो न्हय हाची खात्री कंत्राटदारान एक वर्सा खातीर करची पडटली. कारण पयलो अपघात जाल्यार २५ लाख रुपया दंड भरचो पडटलो, आनी दुसरो अपघात जाल्यार ५० लाख रुपया मेरेन दंड भरचो पडटलो. ताचे परस चड अपघात जाल्यार कंत्राटदाराचो परवानो रद्द जातलो.
रस्त्याच्या डिझायन वा अभियांत्रिकी चुकांक एनएचएआय जापसालदार आसतलो. पूण कंत्राटदाराक खड्डे, उदक भरप, चुकीचे लेनींत वाहनां काडप, मोडिल्लीं वाहनां काडप, जनावरांक प्रवेश आडावप अशीं कामां पळोवचीं पडटलीं. ते खातीर दरेका कंत्राटदाराक सुरक्षेचो सर्वेयर आसप सक्तीचें आसतलें, जो नेमान तपासणी करतलो. दरेका रस्त्याच्या विभागाचेर कंत्राटदाराची म्हायती आनी क्यूआर कोड आशिल्लें बोर्ड बसयतले. खंयचोय मोटार चालक क्युआर कोडांतल्यान खड्डे, उदक भरप वा चुकीच्या लेन विशीं म्हायती धाडूंक शकता. ही म्हायती रियल टायमांत एनएचएआय मेरेन पावतली. तशेंच अपघात डेटांतलो फरक पयस करपा खातीर एनएचएआय आतां पुलीस, राज्य सरकार आनी स्वताच्या पोर्टलाक जोडटले. हाका लागून अपघातां विशीं अचूक आनी वेळार डेटा मेळटलो.
देशांत म्हामार्गांचेर कितल्या लोकांचो जीव वता?
सरकारी आंकडेवारी प्रमाण, २०२५ मेरेन देशभरांतल्या म्हामार्गांचेर १३,८०० ब्लॅक स्पॉट्स निश्चीत केल्यात. २०२३ वर्सा म्हामार्गांचेर वट्ट ५३,३७२ लोकांक मरण आयलां. २०२४ वर्सा ५२,६०९ आनी २०२५ वर्सा फकत स म्हयन्यांत २६,७७० लोकांक अपघातांत मरण आयलें. ह्या अपघातांतले चडशे अपघात ब्लॅक स्पॉटांचेर जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
