भांगरभूंय | प्रतिनिधी
पणजीः गोंयांतल्या सरकारी म्हाविद्यालयांतल्या कला आनी वाणिज्य फांट्यांतल्या निमाण्या वर्साच्या विद्यार्थ्यांक रोजगारा खातीर गरजेचें कुशळटाय प्रशिक्षण दितले. शिक्षकांकय प्रशिक्षण दितले. ते खातीर हालींच उच्च शिक्षण संचालनालय आनी हुबळींतल्या देशपांडे शिक्षणीक ट्रस्टाच्या स्पेलिंग इन्स्टिट्यूट हांचे मदीं समजिकाय कबलातीचेर सय केल्या. ह्या वेळार मुख्यमंत्री डॉ. प्रमोद सावंत, शिक्षण सचीव प्रसाद लोलयेंकार, गुरूराज देशपांडे आनी हेर मानेस्त हाजीर आशिल्ले.
कबलाती प्रमाण निमाण्या वर्साच्या विद्यार्थ्यांक अतिरिक्त अभ्यासक्रम म्हणून ‘स्किलप्लस’ दितले. हाचे प्रमाण विद्यार्थ्यांची संवाद, विश्लेशण आनी कामाच्या सुवातेर कुशळटाय वाडोवपाचेर भर दितले. हें प्रशिक्षण ह्या म्हयन्यांत खांडोळेंतल्या एका सरकारी म्हाविद्यालयांतल्या 30 विद्यार्थ्यांक दितले. ह्या विद्यार्थ्यांक नोकरी वा रोजगारा खातीर गरजेचें कुशळटाय प्रशिक्षण दितले. सध्याच्या उद्देगीक क्षेत्रांतल्या गरजां प्रमाण विद्यार्थ्यांक रोजगारा खातीर योग्य कुशळटाय दितले.
तशेंच विद्यार्थ्यांच्या शिक्षणीक अभ्यासक्रमाक वेव्हारीक प्रशिक्षण दिवन पूरक करप आनी ताका लागून गोंयच्या उच्च शिक्षण क्षेत्रांत रोजगारक्षमता पर्यावरण प्रणाली घटमूट करप हो ह्या एमओयूचो हेत आसा. सरकारी म्हाविद्यालयांच्या वेंचून काडिल्ल्या कर्मचाऱ्यांक देशपांडे कुशळटाय संस्थेंतय प्रशिक्षण दितले. हाका लागून तांचें कुशळटाय आदारीत शिकप, फुडारपणाचे गूण आनी अंमलबजावणी क्षमता वाडोवपाक मजत जातली.
हो उपक्रम उच्च शिक्षण संचालनालय आनी सहभागी म्हाविद्यालयांत दीर्घकालीन संस्थात्मक उच्च शिक्षण संचालनालयांत आनी सहभागी म्हाविद्यालयांनी क्षमता निर्माण करतलो. हाका लागून तांकां स्वतंत्रपणान कुशळटाय आदारीत कार्यावळी तयार करपाक मेळटल्यो. तशेंच विद्यार्थ्यां खातीर अर्थपूर्ण रोजगार आनी इंटर्नशिपाची वाट मेकळी जातली. एकंदरीत ही समजिकाय कबलात शिक्षणीक अभ्यासक्रम आनी रोजगारक्षमतेतलें अंतर भरून काडपा खातीर एक धोरणात्मक पावल थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
