भांगरभूंय | प्रतिनिधी
वास्कोः सांकवाळ जिल्हो पंचायतींत जी उदरगत जाल्या तितली हेर खंयच जावंक ना. सांकवाळ जिल्लो पंचायती खातीर मेळिल्लो सगळो निधी उदरगतीच्या कामां खातीर खर्च जाला, अशें पंचायत मंत्री मावीन गुदिन्हो हांणी स्पश्ट केलें. फुडले जिल्लो पंचायत वेंचणुकेंत सध्याची जिल्लो पंचायत वांगडी अनिता थोरात उमेदवार आसतली अशेंय गुदिन्हो हांणी सांगलें.
माटोळे दाबोळी हांगा साकव बांदप, अासय डोंगरी हांगा उक्त्या जाग्याचें सोबितीकरण करप, ज़ुआरीनगर हांगा उक्त्या जाग्याची उदरगत अशीं तीन कामांचो शुभारंग मंत्री गुदिन्हो हांचें हस्तुकीं जालो. ह्या निमतान दक्षिण गोंय जिल्हो पंचायत अध्यक्ष आनी सांकवाळ जिल्लो पंचायत वांगडी अनिता थोरात, चिखली सरपंच कमला प्रसाद यादव, उपसरपंच ऐश्वर्या कोरगांवकार, सांकवाळ पंच संतोष देसाय, दाबोळी भाजपा मंडळ अध्यक्ष सचिन चौगुले आनी हेर मानेस्त हाजीर आशिल्ले.
दरेक जिल्हो पंचायतींत उदरगतीचीं कामां सुरू आसात. चिखलीच्या पंचायत घराचो जीर्णोध्दार जातलो. हे खातीर सुमार साडेतीन कोटी रुपया खर्च जातले.
तशेंच चिकोळणा-बोगमाळो पंचायतीचें पंचायत घराचें बांदपाचें काम वेगान सुरू आसा, अशें तांणी स्पश्ट केलें
अनिता थोरात हांणी आपल्या जिल्हो पंचायत वाठारांत खूब उदरगतीचीं कामां केल्यात.ते खातीर फुडले वेंचणुकेंत अनिता थोरात उमेदवार जावंक जाय अशें म्हजें मत आसा.
पूण उमेदवारीचेर पक्ष निर्णय घेतलो, अशें ताणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
