भांगरभूंय | प्रतिनिधी
एन. विनोदकुमार : 20 नोव्हेंबराक येतली पयली कार्गो बोट
भांगरभूंय । प्रतिनिधी
पणजी : मुरगांव बंदरांत परतून कार्गो सेवा सुरू जावपाची आसा. 20 नोव्हेंबराक गोंयांत सेवेची पयली कार्गो बोट मुरगांव बंदराच्या धक्याक लागतली. उद्देग मळा वयली मागणी पळोवण हे सेवेचो फु़डाराक विस्तार जातलो, अशी म्हायती मुरगांव बंदर प्राधिकरणाचे चेअरमन एन. विनोदकुमार हांणी दिली.
हे विशीं अदीक म्हायती दितना विनोदकुमार हांणी सांगलें, भारतीय शिपींग म्हामंडळान गोंयांतलें कार्गो बोटीचें वेळापत्रक थारयलां आनी पयली कार्गो बोट 20 नोव्हेंबराक एमपीएंत दाखल जातली.
आमी शिपींग म्हामंडळा कडेन चर्चा चालू करून तांकां धक्यार लागपी बोटी विशींची आंकडेवारी जारी करपा खातीर यत्न करतात. आमकां एक कार्गा बोट 15 दिसांत एक खेपे आयल्ली जाय. जे वरवीं उद्देगाची उदरगत जावन ज्यो बोटी येतात तांकां चडांत चड कार्गो मेळटलो असो विस्वास तांचे मदीं तयार जातलो, अशी म्हायती विनोदकुमार हांणी दिली.
कार्गो बोट आनी तांचे दीस फुडाराक वाडोवपा विशीं विचारलें, तेन्ना विनोदकुमार हांणी सांगलें, सध्या आमकां प्रायोगीक तत्वाचेर 20 नोव्हेंबराक कशेय करून कार्गो बोट सुरू करपाक जाय. सध्या बोटी चडांत चड कार्गो अपेक्षीत करतात, जाल्यार उद्देग मळार चडांत चड कार्गो बोटी अपेक्षीत करतात, अशी स्थिती जाल्या. अशे परिस्थितींत आमकां खंयतरी ही सेवा एकदांची सुरू करून एमपीएन परतून कार्गो सेवा सुरू केल्या, असो विस्वास उद्देग मळा भितर तयार करपाक जाय. ह्या विस्वासाचें रुपांतर उपरांत वेवसायांत जातलें, अशें विनोदकुमार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
