भांगरभूंय | प्रतिनिधी
हॉटेल, रियल इस्टेट मळार रोजगार टक्केवारींत गोंय मुखार
भांगरभूंय । प्रतिनिधी
पणजी : गोंयांत सेवा मळा वयली रोजगार निर्मिती सगल्यांत चड आसा. सेवा मळाचे आनीक वांटे केले जाल्यार हॉटेल, खाद्यपदार्थ आनी पेयपान तशेंच रियल इस्टेटींत रोजगार निर्मितींत गोंय देशांत मुखार आसा. अर्थीक वर्स 2023-24 त गोंयांतल्या सेवा मळा वयल्या वट्ट रोजगारांतले 18.6 टक्के रोजगार हॉटेलांतल्यान जाल्यार 3.8 टक्के रियल इस्टेट मळांतल्यान आयिल्लो. नीती आयोगान हालींच जारी केल्ल्या भारताचें सेवा मळ ह्या अहवालांतल्यान ही म्हायती मेळ्ळ्या.
अहवाला प्रमाण, अर्थीक वर्स 2023-24 त गोंयांत वट्ट रोजगारांतल्या रियल इस्टेट मळांतलो 3,8 टक्के रोजगार आसा. हाची राष्ट्रीय सरासरी फक्त 0.7 टक्के आसा. गोंयांत ठोक आनी किरकोळ वेपार सेवा मळार सगल्यांत चड 28.8 टक्के रोजगार आसा. हाची राष्ट्रीय सरासरी 34.4 टक्के आसा. ते उपरांत गोंयांत विवीध पद्दतीची येरादारी आनी वेअरहावस हातींत 12 टक्के, शिक्षण मळार 10.4 टक्के, भौशीक प्रशासन आनी लश्करी मळा वयलो रोजगार 6.7 टक्के आसा. ते भायर गोंयांतल्या वट्ट रोजगारा मदीं भलायकी आनी समाजीक वावर मळार 4.3 टक्के, विवीध तरांच्या घरगुती कामां वरवीं रोजगार 5.9 टक्के, वेवसायीक विज्ञानीक वा तांत्रीक मळार 2.8 टक्के, अर्थीक आनी विमो संबंदीत सेवा 2.1 टक्के, सहायक सेवा मळार 1.9 टक्के जाल्यार हेर सेवा मळार 1.2 टक्के रोजगार आसा, अशें अहवालांत म्हणलां.
उणे रोजगारांचे मळ
गोंयांत सगल्यांत उणे रोजगार कला, मनरिजवण (0.5 टक्के), म्हायती आनी दळणवळण (1.1 टक्के) ह्या दोन मळार आशिल्ल्याचें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
